«Qarasora» operatsııasy: ІІM zańsyz aınalymnan 8,5 tonnadan astam esirtki tárkiledi
– Eki aıda polıtseıler 678 esirtki qylmysyn anyqtady, onyń ishinde 299 ótkizý faktisi, asa iri mólsherde esirtkini saqtaýdyń 126 faktisi, esirtkini tutyný úshin prıtondy ustaýdyń 2 faktisi. Zańsyz aınalymnan 8,5 tonnadan astam esirtki, onyń ishinde 67 kg geroın, 1 tonna 175 kg marıhýana, 94 kg gashısh jáne 23,7 kg sıntetıka tárkilendi, – dep habarlady ІІM esirtki qylmysyna qarsy is-qımyl departamenti.
25 qatysýshydan quralǵan úsh uıymdasqan qylmystyq toptyń qyzmeti joıyldy, olardyń ekeýi – shetel azamattary. Olardan sıntetıkalyq esirtki óndirýge arnalǵan 72 tonnaǵa jýyq túrli prekýrsor, zerthanalyq jabdyqtar salynǵan 7 qorap, 40 kg marıhýana jáne 4 kg gashısh tárkilendi. Qyzylorda, Jambyl, Túrkistan oblystarynda jáne Shymkent qalasynda arnaıy operatsııa barysynda quramynda esirtki bar ósimdikterdi ósirýdiń 183 faktisi anyqtaldy. Qarasora plantatsııalaryn anyqtaý úshin Ulttyq ulannyń tikushaqtary men Qorǵanys mınıstrliginiń drondary qoldanylyp jatyr. Olardyń kómegimen 4 esirtki plantatsııasy anyqtaldy. Onda qylmyskerler quramynda tetragıdrokannabınoldyń mólsheri joǵary marıhýana jasaıtyn 8 myńǵa jýyq «úndi qarasorasynyń» butalaryn ósirgen. Eldiń soltústik óńiri de baqylaýsyz qalmady. Pavlodar oblysynyń polıtseıleri 67 kg geroın men 10 kg gashısh kontrabandasynyń jolyn kesti. Esirtkini shetel azamaty qarbyzǵa jasyryp ótpek bolǵan. 4 esirtki zerthanasy anyqtaldy, 11 kúdikti ustaldy, 2 tonna prekýrsor jáne 22 kg daıyn mefedron tárkilendi. «Qarasora» arnaıy operatsııasy jalǵasýda.
Aqparat kózi Polisia.kz saıtynda: https://polisia.kz/qarasora-operatsiyasy-iim-zangsyz-ajnalymnan-8-5-tonnadan-astam-esirtki-tarkiledi/
