Qarasora – 2026: Qazaqstanda esirtkige qarsy respýblıkalyq operatsııa bastaldy
ASTANA. KAZINFORM – Qazaqstanda esirtki quraldarynyń zańsyz aınalymyna qarsy baǵyttalǵan «Qarasora – 2026» respýblıkalyq jedel-profılaktıkalyq is-sharasy bastaldy.
Іshki ister mınıstrliginiń málimetinshe, operatsııa 1 maýsym men 31 qazan aralyǵynda ótkiziledi jáne esirtki qylmystarynyń aldyn alýǵa, anyqtaýǵa ári jolyn kesýge baǵyttalǵan.
Operatsııa barysynda quramynda esirtki bar ósimdikterdiń zańsyz egistikterin anyqtaý, jabaıy ósetin oshaqtaryn joıý, esirtki plantatsııalarynyń qyzmetin toqtatý jáne esirtki tasymaly arnalarynyń jolyn kesý jumystary júrgiziledi.
– Negizgi nazar esirtki daıyndaýmen, tasymaldaýmen jáne ótkizýmen aınalysatyn qylmystyq toptardyń qyzmetin áshkereleýge, sondaı-aq quramynda esirtki bar ósimdikterdiń zańsyz egistikteri men olardyń jabaıy ósetin oshaqtaryn anyqtap, joıýǵa aýdarylady, – dep habarlady ІІM.
Vedomstvo málimetinshe, operatsııa aıasynda sıntetıkalyq esirtki óndirý faktilerin anyqtaý, esirtki saqtaý oryndaryn tabý jáne zańsyz aınalymǵa qarsy keshendi sharalar qabyldanady.
Іs-sharaǵa ishki ister organdarynyń qyzmetkerlerimen qatar Qorǵanys mınıstrligi, Ulttyq ulan jáne jergilikti atqarýshy organdardyń kúshteri men quraldary jumyldyrylady. Aýyl sharýashylyǵy alqaptarynda tekserýler júrgizilip, aýmaqtarǵa zamanaýı tehnıkalyq quraldar arqyly monıtorıng jasalady.
– Qazaqstan Respýblıkasynyń zańnamasyna sáıkes quramynda esirtki bar ósimdikterdi zańsyz ósirgeni, esirtki quraldaryn daıyndaǵany, saqtaǵany, tasymaldaǵany jáne ótkizgeni úshin qylmystyq jaýapkershilik kózdelgen. Osyǵan baılanysty azamattardy mundaı quqyq buzýshylyqtar týraly polıtsııaǵa habarlaýǵa shaqyramyz, – dep eskertti mınıstrlik.
ІІM ókilderiniń aıtýynsha, «Qarasora – 2026» operatsııasy esirtki qylmysyna qarsy kúres pen qoǵamdyq qaýipsizdikti qamtamasyz etýge baǵyttalǵan júıeli jumystyń mańyzdy bóligi bolyp tabylady.
Aıta keteıik, Shymkentte sıntetıkalyq esirtki taratýmen aınalysqan kúdikti ustaldy.
