Qarashyǵanaqtyń keńeıtilýine baılanysty kóshirilgen aýyldarǵa mektep salynýda
ORAL. QazAqparat - Qańtar aıynda Berezov jáne Bestaý balalaryna arnalǵan jańa mektep ashylmaq, dep habarlaıdy «QazAqparat» tilshisi.
BQO ákimi Altaı Kólginov bul týraly óziniń Tvıtterdegi paraqshasynda jazdy.
Óńir basshysy Bórli aýdanyna jumys sapary barysynda Araltal aýylynda Berezov jáne Bestaý aýyldarynan kóship kelgen balalarǵa arnalyp salynǵan 300 oryndyq mektepte boldy. Qurylysy ótken jyldyń tamyzynda bastalǵan bul nysanǵa 850 mln teńge bólingen edi.
Sonymen qatar Aqsaı qalasynda osy aýyldar turǵyndaryna arnalǵan eki 9 qabatty turǵyn úı qurylysy da aıaqtaldy. Munda páterlerdiń jalpy sany - 153, sonyń ishinde 36-sy - bir jáne tórt bólmeli, 54-i - eki bólmeli, 27-si - úsh bólmeli. Túrli merdigerlik uıymdar turǵyzǵanymen, úılerdiń turqy birdeı deýge bolady. Bir ereksheligi, ekeýinde de derbes qazandyq ornatylǵan.
Oblys basshysy Berezov jáne Bestaý aýyldarynyń turǵyndarymen áńgimelesken kezde olar ózderiniń jańa qonystaryna rıza ekendikterin jetkizdi.
Aıta keteıik, Qarashyǵanaq kenishiniń sanıtarlyq-qorǵaý aımaǵy keńeıtilgendikten, oǵan kirgen Berezov pen Bestaý aýyldarynyń turǵyndaryn kóshirý jóninde sheshim qabyldanǵany belgili. Bıyl qos aýyl turǵyndarynyń bir bóligi Araltal aýylynda jańadan salynǵan úsh jáne tórt bólmeli úılerge qonystanyp úlgerdi. Endi qalǵandary Aqsaıdaǵy qos úıge kóshýdi bastady. Olarǵa tıisti ótemaqy tólendi.
Ákimniń sózine qaraǵanda, aldaǵy jyl basynda atalǵan aýyldarda eshkim qalmaıdy, bári de kóship bolýy tıis.
