Qarashyǵanaqtyń el ekonomıkasyn damytýdaǵy mańyzy erekshe - Qanat Bozymbaev

ORAL. QazAqparat - Qarashyǵanaq kenishiniń el ekonomıkasyn damytýdaǵy mańyzy erekshe. Bul týraly BQO aktıvimen kezdesken QR Energetıka mınıstri Qanat Bozymbaev málim etti, dep habarlaıdy QazAqparat tilshisi.

Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna baılanysty alda turǵan maqsat-mindetterge toqtalǵan Q.Bozymbaev osy oraıda mınıstrliktiń ákimdiktermen jáne óńirlerdegi otyn-energetıka kesheni kásiporyndarymen birlesip, áleýmettik jaýapkershilikti arttyrýǵa baǵyttalǵan sharalar qabyldaıtynyn jetkizdi.

Mysaly, «Qarashyǵanaq Petrolıým Opereıtıng» kompanııasynyń basshylyǵynan jalaqysy tómen qyzmetkerlerdiń eńbekaqysyn kóterýdiń tıimdi sharalaryn kútýge bolady.

Atalmysh kompanııa tarapynan Qarashyǵanaqtyń damý jyldarynda Batys Qazaqstan oblysynyń áleýmettik jáne ınfraqurylymdyq damýyna 342 mln AQSh dollary bólindi. 14 densaýlyq saqtaý, 28 bilim berý, ondaǵan ınfraqurylym, 12 mádenı-sporttyq nysandar salyndy. Jalpy, óńirdiń áleýmettik ınfraqurylymyn damytýǵa jyl saıyn 20 mln AQSh dollary qarastyrylady.

«Qarashyǵanaq jobasy aktsıonerlerimen úsh jyldan astam ýaqytqa sozylǵan talasty máselelerdi retteýge qol jetkizildi. Bul retteýdiń respýblıka úshin jıyntyq qarjylyq quny 1,7 mlrd AQSh dollaryn quraıdy, sonyń 1,3 mlrd dollaryn memleket taıaý jyldary alady», dedi mınıstr.

Oǵan qosa konsortsıým Qarashyǵanaqtyń bolashaq damýy úshin mańyzdy ınvestıtsııalyq jobalardy ýaqtyly júzege asyrýdy mindetine aldy. Aldyn ala málimet boıynsha ınvestıtsııa kólemi 5 mlrd AQSh dollaryn quraıdy. Bul rette munaı baǵasy $80/barrel dep eseptegende, respýblıka úshin jyl saıynǵy tabys ósimi 2037 jylǵa deıin 23,5 mlrd AQSh dollaryndaı bolýy múmkin.

Sonymen qatar jergilikti munaı óńdeý zaýyttary men Batys Qazaqstannyń gazhımııalyq keshenin damytý úshin kómirsýtegi shıkizatyn (munaı men gaz) jetkizý múmkindigin qaraý kelisildi. Bul otandyq ónim óndirýshilerdiń tabysty damýyna jáne básekege qabiletti bolýyna septesedi. «Qazbýrgaz» sııaqty kompanııalar qazirdiń ózinde Teńiz keshenin keńeıtý jobasyna qatysýǵa múmkindik aldy.

Bıyl «QPO» qazaqstandyq kompanııalarǵa taýarlar, jumystar men qyzmetter úshin 208,9 mln AQSh dollaryn (barlyq satypalýdyń 56 paıyzy) tóledi. Kadrdaǵy jergilikti úles 2000 jyldan beri úsh eseden astamǵa (1186-dan 3708 adamǵa deıin) artyp, 91 paıyzǵa jetti.

Qarashyǵanaqty odan ári ıgerýdegi negizgi jobalardyń biri - gaz qýattaryn jańǵyrtý, 4-kompressor jáne 5-kásipshilikishilik turba qubyryn salý. Investıtsııa kólemi 1 mlrd astam AQSh dollarynan asatyn bulardy 2020 jylǵa deıin júzege asyrý kózdelýde.

«Osylaısha Qarashyǵanaq óńir damýynyń draıveri bolyp qala bermek. Ol el ekonomıkasyn damytýǵa da súbeli úlesin qosady. Bul bastamalardyń barlyǵy mınıstrliktiń turaqty baqylaýynda bolmaq», dedi Qanat Bozymbaev.

Mınıstr salaǵa qatysty ózge de mańyzdy máselelerge toqtalyp, Elbasy tapsyrmalaryn ýaqtyly oryndaýdyń mańyzdylyǵyn atap kórsetti.