Qarashyǵanaqta munaı óndirisin ulǵaıtýǵa 5 mlrd teńge baǵyttalmaq

ASTANA. QazAqparat - Energetıka mınıstri Qanat Bozymbaev elimizdiń basty munaı óndirý oryndarynda óndiristi ulǵaıtý úshin qandaı jumystar atqarylǵaly jatqanyn aıtyp berdi, dep habarlaıdy QazAqparat tilshisi.

«Aldymen, quny 36,8 mlrd AQSh dollary turatyn (onyń ishinde 32 paıyzy, 12 mlrd AQSh dollary qazaqstandyq úleske tıesili) Teńizde búgingi tańda 46  myńnan astam qazaqstandyq jumys isteıdi. 400-den astam otandyq servıstik kompanııa qurylys, metalqurylymdaryn shyǵarý jáne taǵy da basqa jumystarǵa tartyldy. Al Qashaǵanda táýligine 330 myń barrel kóleminde munaı turaqty túrde óndirilip jatyr. Óndiristi arttyrý jobalary belsendi túrde jalǵasýda. Sonymen birge, bolashaqta Qashaǵan jobasyn keńeıtý tujyrymdamasy boıynsha taldaý jumystary bastaldy. Aldyn ala boljam boıynsha 2024 jylǵa qaraı óndiris kólemi táýligine 450 myń barrelge jetkizilmek», - dedi Qanat Bozymbaev OQK-da ótken baspasóz máslıhatynda.

Mınıstrdiń aıtýyna qaraǵanda, Qarashyǵanaq jobasy boıynsha Qarashyǵanaq konsortsıýmynyń aktsıonerleri arasyndaǵy daý sheshilip, tıisti kelisimge qol qoıylǵan.

«1,1 mlrd kóleminde (2019-2021 jyldary) shyǵyndy óteýdi jáne 2037 jylǵa deıin munaı baǵasy barreline 60 dollar bolǵan jaǵdaıda respýblıkanyń úlesin 360  mln AQSh dollaryna ulǵaıtý týraly negizgi ýaǵdalastyqtarǵa qol jetkizildi. Sonymen qatar, Qarashyǵanaqta uzaq merzimge munaı óndirýdiń joǵary deńgeıin saqtaý úshin jańa uńǵymalardy burǵylaý, keńeıtý jumystaryna aldaǵy 5 jylda 5 mlrd AQSh dollary ınvestıtsııa baǵytalatyn bolady», - deıdi ol.

Qanat Bozymbaev atap ótkendeı, 2018 jyly Jer qoınaýy jáne jer qoınaýyn paıdalaný týraly kodeks pen Salyq kodeksiniń jańa normalar kúshine engen. Osy zańnamalyq ózgerister jer qoınaýy salasynyń, sonyń ishinde teńiz jobalaryn ınvestıtsııalaýdaǵy tartymdylyqty kúsheıtip otyr. Soǵan baılanysty, QazMunaıGaz ben ENI kompanııasymen Isataı jobasyn iske asyrýdy bastap ketken.

«ENI kompanııasymen Abaı jobasy jáne Lýkoıl kompanııasymen Kaspıı teńiziniń qazaqstandyq sektoryndaǵy Jeńis jobasyna qatysty kelisimderdiń sharttary talkylanyp jatyr. Osyndaı jobalardy júzege asyrýdyń arqasynda ınvestıtsııalardy tartýǵa, óndiris kólemin arttyryp, salyq túsimin kamtamasyz etýge múmkindik zor», - dedi Qanat Bozymbaev.