Qarashyǵanaq jobasynyń tabysy 20,7 mlrd. dollardy qurap otyr - S. Myńbaev
ASTANA. 5 naýryz. QazAqparat - Búginge deıin Qarashyǵanaq jobasynyń taza tabysy 20,7 mlrd. dollardy qurady. Bul týraly búgin Parlament Májilisiniń Úkimet saǵatynda Munaı jáne gaz mınıstri Saýat Myńbaev málim etti.
«Búgingi kúni Qarashyǵanaq jobasy ıgerýdiń ekinshi kezeńinde tur. Onyń kólemi jyl saıyn shamamen 11 mln. tonna suıyq kómirsýtek jáne 14-15 mlrd. tekshemetr gaz óndirýmen sıpattalady. 2012 jylǵy qańtarǵa deıin barlyǵy 114 mln. tonna suıytylǵan kómirsýtek jáne 136 mlrd. tekshemetr gaz óndirildi. Jobany iske asyrýdan bastap 2012 jylǵy qańtarǵa deıin ónim óndirý bóliminde shamamen 38 mlrd. dollar tústi. Odan merdigerge 17,3 mlrd. dollardyń ınvestıtsııalary qaıtaryldy», - dedi S. Myńbaev.
Onyń aıtýynsha, búgingi kúni Qarashyǵanaq jobasynyń taza tabysy 20,7 mlrd. dollardy quraıdy. Munda respýblıka tabysy 9,3 mlrd., al qatysý úlesi 4,3 mlrd. dollardy qurasa, merdiger 7,5 mlrd. dollarǵa ıe boldy.
«Sonymen naqty shyǵyndy shegergennen keıingi jobanyń taza tabysyndaǵy respýblıkanyń úlesi 64 paıyzdy quraıdy», - dedi S. Myńbaev.
