Qarashyǵanaq munaıgaz kondensaty kenishinde órt oshaǵyn shuǵyl sóndirý is-sharalary boıynsha keshendi oqýlar ótedi
ASTANA. Tamyzdyń 4-i. QazAqparat /Gúlmıra Álıakparova/ - Tamyz aıynyń aldaǵy 10-shy juldyzynda Qarashyǵanaq munaıgaz kondensaty kenishiniń aýmaǵynda, órt oshaǵyn shuǵyl túrde sóndirý is-sharalary boıynsha keshendi oqýlar ótedi.
QR Tótenshe jaǵdaılar mınıstrliginen málim etkendeı, oqýlarǵa basqarýshy organdar, apatty-qutqarý qyzmetteri (AQQ) men Qarashyǵanaq Petroleým Opereıtıng b.v. kompanııasynyń qurylymdary qatysady.
Ony ótkizýge Batys Qazaqstan oblysy boıynsha «Órt sóndirýshi» AQ fılıalynyń tórt órt sóndirý bólimshesiniń arnaıy tehnıkasy men jeke quramy tartylady.
Oqýlar úsh kezeńmen ótedi: onyń birinshisinde - AQQ men qurylymdar, óndiristik nysannyń hımııalyq zerthana ǵımaratynda shyqqan otty sóndirýi jáne apatty-qutqarý jumystaryn júrgizýi tıis.
Ekinshi kezeńde - AQQ men qurylymdar, №9-shy uńǵymadan shyqqan munaı burqaǵyn toqtatý barysynda tehnologııalyq qurylǵylardy sýytýy, jeke quramdaǵy jáne tótenshe jaǵdaıdy joıýmen aınalysyp jatqan adamdardyń qaýipsizdigin qamtamasyz etýi qajet.
Al úshinshi kezeńde AQQ men qurylymdar, kenishtiń óndiris nysanynan shyqqan tilsiz jaýdy aýyzdyqtap, avtotransporttyń kómegimen ǵımarattarda apatty-qutqarý jumystaryn júrgizedi.
