Qarashyǵanaq konsortsıýmy men Qazaqstan Úkimeti kóp jyldyq daýdy sheshti
Esterińizge sala ketsek, Qarashyǵanaq jobasy Qazaqstan Respýblıkasynyń Úkimeti, Shell (29,25%), ENI (29,25%), Shevron (18%), Lýkoıl (13,5%) sheteldik kompanııalar alıansy jáne QazMunaıGaz (10%) arasynda jasalǵan Ónimdi bólý týraly túpkilikti kelisim aıasynda iske asyrylýda. 2015 jyly respýblıka konsortsıýmnyń paıdany bólýimen jáne ádisteme boıynsha esepteýlerimen kelispeıtinin bildirdi. Osy kommertsııalyq kelispeýshilik nátıjesinde Qazaqstan Ónimdi bólý týraly túpkilikti kelisimniń talaptaryna sáıkes halyqaralyq tórelikke júgindi. Tórelik protsesi júrip jatqan kezde Úkimet pen Konsortsıým ózara qolaıly sheshim tabý jáne kelispeýshilikterdi sheshý úshin kelissózder júrgizgen edi.
Energetıka mınıstrliginiń málimetinshe, daýdy aıaqtaý týraly kelisim aıasynda Konsortsıým Qazaqstan Respýblıkasyna 1 mıllıard 305 mıllıon AQSh dollary kóleminde tólem jasap, taraptar ónim bólýdiń túpkilikti ádistemesin kelisti. Nátıjesinde Qazaqstan 2037 jylǵa deıin qosymsha 600 mıllıon AQSh dollaryn (munaı baǵasy 1 barrel úshin 40-50 AQSh dollary bolǵan kezde) alady. Sonymen qatar taraptar Qarashyǵanaq ken ornyndaǵy óndirý deńgeıin odan ári ustap turý maqsatynda Qarashyǵanaq-1 (A) keńeıtý ınvestıtsııalyq jobasyn iske asyrýdyń bastalýyn maquldady.
Qarashyǵanaqty keleshekte keńeıtý jobasynyń (QKJ (1A) ınvestıtsııalyq kólemi shamamen 1 mıllıard AQSh dollaryn quraıdy jáne gazdy keri aıdaý kompressoryn jáne onymen baılanysty qondyrǵylardy salýdy kózdeıdi. Bul suıyq kómirsýtekter óndirý kólemin jylyna 10-11 mln deńgeıinde ustap turýǵa múmkindik beredi. QKJ (1A) iske asyrý jergilikti qamtýdyń eń az úlesin taýarlardy, jumystar men kórsetiletin qyzmetterdi satyp alýda 45 jáne personaldy jaldaýda 75 paıyz mólsherinde qamtamasyz etýdi kózdeıdi. Keıinnen taraptar jobanyń tehnıkalyq-ekonomıkalyq parametrlerin eskere otyryp, QKJ 1 (V) iske asyrýdyń kelesi kezeńin júzege asyrý múmkindigin qarastyrdy.
«Qazaqstan Respýblıkasy Úkimetiniń resmı ókiliniń aıtýynsha, taraptar daýdy aıaqtaý týraly kelisimge qol qoıý arqyly uzaq merzimdi daý máselesinde sońǵy núkte qoıdy. Kelispeýshiliktiń máni – ónimdi jáne sáıkesinshe aqshalaı kiristi taraptar arasynda ádil bólý. Respýblıka qatań túrde qol qoıylǵan kelisimshart talaptaryna jáne qoldanylatyn zańnamaǵa sáıkes áreket etkenin atap ótken jón. Uzaq jáne qıyn kelissózder nátıjesinde taraptar daýdy bitimgershilikpen sheshýge qol jetkizdi. Bul respýblıkanyń ınvestorlarmen týyndaıtyn daýlardy kelisimshart erejelerine sáıkes ózara qolaıly sheshýge beıimdiligin kórsetti»,- dep atap ótken mınıstrlikten.
