Qarashókeev: Óńirlerge arzandatylǵan dızel otyny bıyl 20 myń tonnaǵa kóp bólinedi

NUR-SULTAN. QazAqparat – QR Aýyl sharýashylyǵy mınıstri Úkimet otyrysynda bıylǵy egis jumystaryna tuqym ázirleý qalaı uıymdastyrylyp jatqanyn baıandady, dep habarlaıdy QazAqparat tilshisi.

«Memleket basshysynyń 2022 jylǵy 16 naýryzdaǵy Qazaqstan halqyna Joldaýynda aıtylǵan tapsyrmalardy oryndaý maqsatynda Aýyl sharýashylyǵy mınıstrligi mynadaı sharalar qabyldaýda.

Egis naýqanyn ýaqtyly jáne sapaly júrgizý úshin mınıstrlikte kóktemgi dala jumystarynyń barlyq týyndaǵan problemalyq máselelerin jedel sheshýge kúsh salatyn Jedel shtab qurylyp, jumys isteýde», - dedi vedomstvo basshysy.

Sondaı-aq, ol mınıstrlik óńirlermen birlesip aýyl sharýashylyǵy tehnıkasynyń, tuqym men tyńaıtqyshtardyń daıyndyǵyn qaıta tekserýge kiriskenin atap ótti.

«Qazirgi tańda tehnıka daıyndyǵy 95 paıyzdy qurasa, kóktemgi dala jumystary jappaı júrgizile bastaǵan ýaqytqa 100 paıyzdy quramaq», - degen mınıstr fermerlerdi arzatylǵan janarmaımen qamtý máselesine toqtaldy.

«Óńirlerge arzandatylǵan dızel otyny jóneltile bastady. Jalpy kóktemgi dala jumystaryn júrgizýge naryqtyq baǵadan 12-15%-ǵa tómen baǵamen 400 myń tonna bólindi. Bul 2021 jylmen salystyrǵanda 20 myń tonnaǵa kóp. 2,3 mln tonna tuqym nemese jospardyń 100 paıyzy quıyldy.

Qazirgi ýaqytta ımporttyq tuqym materıalyn jetkizý máselesi pysyqtalýda. Bular – Reseıden keletin 19,5 myń tonna júgeri, bıdaı, arpa jáne qara bıdaı tuqymy jáne Eýropadan jetkiziletin 80 tonna júgeri men qant qyzylshasynyń tuqymy», - dedi Erbol Qarashókeev.