Qarashyǵanaqtaǵy jańa gaz óńdeý zaýyty: joba ınvestıtsııalyq sheshim qabyldaý kezeńine ótedi

ASTANA. KAZINFORM – QR Energetıka mınıstrliginde qýattylyǵy jylyna 4 mlrd m³ gaz óndiretin Qarashyǵanaq gaz óńdeý zaýytynyń (KGÓZ) qurylysy jobasy boıynsha keńes ótti. Qazaqstan Respýblıkasynyń Energetıka mınıstri Almasadam Sátqalıev «Qarashyǵanaq Petroleým Opereıtıng B.V.» (KPO) jáne Hyundai Engineering Co Ltd.kompanııalarynyń ókilderimen kezdesti.

Kezdesýge qatysýshylar jobanyń negizgi kezeńderin, sonyń ishinde ınjınırıng, satyp alý jáne qurylys (EPC) boıynsha bas merdiger qyzmetin atqaratyn Hyundai Engineering kompanııasymen jumysty talqylady.

Almasadam Sátqalıev Qazaqstannyń Qarashyǵanaq kenishin ıgerýge úlken mán beretinine toqtalyp, zaýyt qurylysyn ýaqytyly aıaqtaý úshin merdigerlermen tıimdi yntymaqtastyqtyń mańyzdylyǵyn atap ótti.

— Qarashyǵanaqta jańa gaz óńdeý zaýytynyń qurylysy kenishtiń ózin ǵana emes, elimizdiń barlyq gaz salasyn damytý úshin strategııalyq mańyzdy qadam bolyp tabylady. Biz gaz óńdeýdi aıtarlyqtaı arttyryp, ishki naryqty taýarlyq gazben qamtamasyz ete alamyz. Bul shynymen de aýqymdy joba, onyń sátti júzege asatynyna senimdimiz, — dep atap ótti Almasadam Sátqalıev.

Taraptar jobany ýaqtyly júzege asyrýǵa óz mindettemelerin rastady jáne 2025 jylǵa deıin Qorytyndy ınvestıtsııalyq sheshimdi (FID) qabyldaý josparlanyp otyrǵanyn atady.

Eske sala keteıik, buǵan deıin Energetıka mınıstri qańtarda munaı óndirý kóleminiń ulǵaıýyn túsindirgen bolatyn.