Qarashyǵanaqta jylyna 5 mlrd tekshe metr gaz óńdeıtin zaýyt 2031 jyly iske qosylmaq
ASTANA. KAZINFORM - Qarashyǵanaq ken ornynda jylyna 5 mlrd tekshe metr shıki gaz óńdeıtin zaýyt salý jobasy júzege asyrylyp jatyr. Jobalaý jáne qurylysqa daıyndyq jumystary júrgizilý ústinde. Erte jer jumystarynyń bastalýy 2027 jylǵa, al kásiporyndy paıdalanýǵa berý 2031 jylǵa josparlanǵan.
Sonymen qatar Batys Qazaqstan oblysynda gaz jáne jylý ınfraqurylymyn damytýǵa, sondaı-aq eldi mekenderdi gazben qamtýǵa baǵyttalǵan jobalar iske asyrylyp jatyr. Bul týraly QR Energetıka vıtse-mınıstri Erlan Akbarovtyń óńirge jumys sapary barysynda málim boldy.
Vıtse-mınıstr oblys turǵyndarymen kezdesýinde gazben jabdyqtaýdy damytý, jylý jelilerin jańǵyrtý jáne Qarashyǵanaq ken ornynda jańa gaz óńdeý qýattaryn qurý jobalaryn tanystyrdy.
Batys Qazaqstan oblysy elimizdegi gazdandyrý deńgeıi eń joǵary óńirlerdiń qataryna kiredi. 2026 jyldyń basyndaǵy jaǵdaı boıynsha oblys halqynyń 99,7%-y, ıaǵnı 694 myńnan astam adam 372 eldi mekende tabıǵı gazben qamtamasyz etilgen. Soǵan qaramastan, óńirde gaz ınfraqurylymyn damytý jumystary jalǵasyp jatyr.
2026 jyly Aqjaıyq jáne Terekti aýdandarynyń, sondaı-aq Báıterek aýdanynyń eldi mekenderin gazben qamtamasyz etý maqsatynda «Rostoshı – Taıpaq» gaz qubyry qurylysynyń birinshi kezegin jalǵastyrýǵa respýblıkalyq bıýdjetten 1,2 mlrd teńge qarastyrylǵan. Budan bólek, Infraqurylymdy damytý qorynan oblystyń gaz jáne ilespe ınfraqurylymyn damytýǵa baǵyttalǵan tórt jobaǵa 3 mlrd teńgeden astam qarajat bólindi.
-Óńirde gazdandyrý deńgeıi joǵary bolǵanymen, ınfraqurylymdy odan ári damytý ózektiligin joǵaltpaıdy. Turǵyndar úshin úılerdiń gazben jáne jylýmen senimdi qamtamasyz etilýi mańyzdy bolsa, kásiporyndar úshin óndiristik qyzmetti turaqty josparlaý múmkindigi mańyzdy. Sondyqtan jelilerdi jańartý jáne gaz óńdeý qýattaryn damytý mınıstrliktiń oblystaǵy jumysynyń basym baǵyttary bolyp qala beredi, – dep atap ótti QR Energetıka vıtse-mınıstri Erlan Akbarov.
Óńirdegi mańyzdy baǵyttardyń biri – Oral qalasynyń jylýmen jabdyqtaý júıesin jańǵyrtý. Bıyl TM-2 jylý magıstralin rekonstrýktsııalaý jumystaryn jalǵastyrýǵa respýblıkalyq bıýdjetten 1,5 mlrd teńge bólindi. Buǵan deıin jobany iske asyrýdy bastaýǵa qajetti qarajat Úkimet rezervinen baǵyttalǵan bolatyn.
Sonymen qatar 2027–2029 jyldarǵa arnalǵan respýblıkalyq bıýdjet jobasynda Zachagansk kentindegi №1 qazandyqtan tartylǵan jylý jelilerin rekonstrýktsııalaýdy bastaýǵa 1,2 mlrd teńgeden astam qarajat qarastyrylǵan. Bul jobalar turǵyn úıler men áleýmettik nysandarǵa jylý berýdiń senimdiligin arttyrýǵa baǵyttalǵan.
Qarashyǵanaq ken ornynda gazdy keri aıdaýǵa arnalǵan altynshy kompressor boıynsha iske qosý-baptaý jumystary da jalǵasyp jatyr. Atalǵan jabdyq gaz óndirý deńgeıin qalypty ustap turýǵa arnalǵan. Qazirgi ýaqytta kompressor synaq rejıminde jumys istep tur. Ony ónerkásiptik paıdalanýǵa kóshirý 2026 jylǵy qarashaǵa josparlanǵan.
Jańa gaz óńdeý zaýytyn iske qosý ishki naryqqa jetkiziletin taýarlyq gaz kólemin arttyrýǵa múmkindik beredi.
Vıtse-mınıstr óńirdi munaı ónimderimen qamtamasyz etý jáne aýyl sharýashylyǵy taýaryn óndirýshilerge janar-jaǵarmaı jetkizý máseleleri jóninde de aqparat berdi. Kúzgi dala jumystaryna Batys Qazaqstan oblysy úshin 11,2 myń tonna dızel otyny qarastyrylǵan. Materıaldar daıyndalǵan kezdegi jaǵdaı boıynsha onyń 7,7 myń tonnasy jóneltilgen. Aýyl sharýashylyǵy taýaryn óndirýshilerge janarmaı jetkizý ótinimderge sáıkes basym tártippen júzege asyrylyp jatyr.
Turǵyndarmen kezdesý aıaqtalǵannan keıin Erlan Akbarov azamattardy jeke máseleleri boıynsha qabyldady. Oblys turǵyndary aýyldyq eldi mekenderdi sapaly elektrmen jabdyqtaý, jekelegen ýchaskelerdi gazdandyrý jáne tarıfterdi qalyptastyrý máselelerin kóterdi. Kelip túsken barlyq ótinish QR Energetıka mınıstrliginiń beıindi qyzmetteri tarapynan odan ári pysyqtaý úshin baqylaýǵa alyndy.
Osyǵan deıin Qashaǵandaǵy alǵashqy gaz óńdeý zaýytyn 2027 jyly iske qosý josparlanǵany týraly jazdyq.
