Qarashyǵanaqta jańa burǵylaý qondyrǵysy iske qosyldy
ASTANA. KAZINFORM — Jańa burǵylaý qondyrǵysy Qarashyǵanaqtyń óndiristik kórsetkishin arttyrmaq, dep habarlaıdy Ónerkásiptik qaýipsizdik komıtetiniń baspasóz qyzmeti.
Batys Qazaqstan oblysyndaǵy Qarashyǵanaq ken ornynda óndiristik jumystar qarqyndy jalǵasyp jatyr. Ken ornyn ıgerý aıasynda № 9899 uńǵymasynda jańa № 249 burǵylaý qondyrǵysy iske qosylyp, burǵylaý jumystary resmı túrde bastaldy. Atalǵan joba óńirdiń munaı-gaz salasyn damytýǵa, óndiristik áleýetti arttyrýǵa jáne qaýipsiz ári tıimdi tehnologııalardy engizýge baǵyttalǵan.
— Burǵylaý qondyrǵysyn iske qosý barysynda óndiristik qaýipsizdik talaptary men tehnıkalyq reglamentterdiń saqtalýyna erekshe nazar aýdaryldy. Jańa burǵylaý qondyrǵysy zamanaýı tehnologııalarmen jabdyqtalǵan jáne joǵary ónimdilik kórsetkishterine ıe. Bul óz kezeginde burǵylaý jumystaryn sapaly ári belgilengen merzimde oryndaýǵa múmkindik beredi. Sonymen qatar, qondyrǵyda eńbek qaýipsizdigin qamtamasyz etýge arnalǵan avtomattandyrylǵan baqylaý júıeleri qarastyrylǵan, — delingen komıtet habarlamasynda.
Qarashyǵanaq ken orny elimizdiń strategııalyq mańyzy bar iri munaı-gaz jobalarynyń biri retinde energetıka salasynyń turaqty damýyna eleýli úles qosyp keledi. № 249 burǵylaý qondyrǵysynyń iske qosylýy óndiristik kórsetkishterdiń artýyna, jańa qorlardy ıgerýge jáne óńir ekonomıkasynyń damýyna oń áserin tıgizedi dep kútiledi.
Buǵan deıin Qazaqstan Qarashyǵanaq gaz óńdeý zaýytyn salý jumysyn jedeldetip jatqanyn jazdyq.
