Qarashyǵanaq aktsıonerleri gaz óńdeý zaýytyn salýǵa Qazaqstannan qosymsha $1 mlrd talap etken
ASTANA. KAZINFORM – Energetıka mınıstrligi Kazinform saýalyna joldaǵan jaýapta Qarashyǵanaq kenishinde gaz óńdeý zaýytyn salý bastamasy nege aıaqsyz qalyp bara jatqanyn túsindirdi.
- Qarashyǵanaq ken ornynyń gaz áleýetin damytyp, eldiń taýarly gaz qoryn bekemdeý – strategııalyq mańyzy bar sharýa.
Eki jyl boıy Qarashyǵanaq gaz óńdeý zaýytynyń jobasy boıynsha tyńǵylyqty kelissóz júrgizildi. Onyń jobalyq qýaty jylyna 4 mlrd tekshe metr gaz óńdeıdi dep josparlanǵan bolatyn. Qazaqstan ol jobaǵa jan-jaqty qoldaý kórsetip baqty.
Alaıda Qazaqstan kelissóz qorytyndysy boıynsha aktsıonerler qoıǵan sharttardy ekonomıkalyq turǵydan qabyldaýǵa kelmeıdi dep tanydy. Onyń ishinde Qarashyǵanaq gaz óńdeý zaýytyn salýǵa ketken shyǵynnyń 100 paıyz ótemine qosymsha 1 mlrd AQSh dollaryn tóleý sharty boldy, - dep jazady mınıstrlik mamandary.
Aktsıonerler bul talapty aınaldyrǵan 3-4 jyldyń ishinde zaýytty salýǵa ketken shyǵyndy qaıtarý múmkin emes dep túsindirgen. Óıtkeni Qazaqstanmen aradaǵy ónim bólisý kelisimi 2033 jyly aıaqtalýǵa tıis.
Qarashyǵanaq aktsıonerleri atalǵan jobany táýelsiz trıbýnalda qaralyp jatqan isti sheshýge paıdalanbaq bolǵanǵa uqsaıdy.
- Onyń ústine, aktsıonerler tarapynan qazir táýelsiz trıbýnal aıasynda júrip jatqan tórelik isti tolyq toqtatý talaby qoıyldy. Osyǵan baılanysty Qarashyǵanaq jobasy boıynsha ónim bólisý týraly aqtyq kelisimniń aıasynda qolǵa alynǵan Qarashyǵanaq gaz óńdeý jobasy jónindegi kelissóz qazirgi tańda aıaqtaldy. Degenmen Qarashyǵanaq kenishiniń gaz áleýeti týraly másele áli de pysyqtalyp jatyr, - delingen resmı jaýapta.
Mınıstrliktegiler bul jobany balama merdigerler tartý arqyly iske asyrý joldary qarastyrylyp jatqanyn aıtady. Onyń ishinde jobany «QazMunaıGaz» ulttyq kompanııasy arqyly alǵa jyljytý ıdeıasy da bar.
- Qazaqstannyń Qarashyǵanaq jobasyndaǵy seriktesterimen iskerlik baılanysy burynǵydaı jáne kenishte gaz óńdeý zaýytyn salý jobasyn jan-jaqty zerdelep jatyr. Óıtkeni joba Qazaqstan úshin strategııalyq turǵydan mańyzdy, - dep jazady mınıstrlik sarapshylary.
Aıta ketý kerek, 2 maýsymda Upstream Online halyqaralyq munaı-gaz basylymy Eni men Shell kompanııalary Qazaqstandaǵy gaz jobasyn toqtatý týraly sheshim qabyldaǵanyn jazǵan bolatyn.