QARAShASh ANA KÚMBEZІ
sp;Qarashash Ana kúmbezi - HІІІ-HІV ǵasyrlardaǵy sáýlet óneri eskertkishi. Qoja Ahmet Iasaýıdiń anasy - Qarashashtyń basyna turǵyzylǵan. Ońtústik Qazaqstan oblysynyń Saıram aýdanynda ornalasqan.
Kúmbezdiń jalpy jobasy sharshylanyp kelgen (6,3 h 6,3 metr), tóbesi kúmbezdi, bıiktigi 7,08 metr. Qabyrǵa qalaýyna qosymsha tireý retinde arsha qoldanylǵan. Ońtústik jáne batysyndaǵy qabyrǵalarynyń mańdaıshalary súıir jebege uqsatylyp órilgen. Órnekti kirpish qalaý ádisimen kúmbez dódegesin aınaldyra beldeý tartqan. Kúmbezdiń tórinde Qarashash ananyń mármár taqtashalarymen kómkerilgen qabiri bar.
Qarashash Ananyń shyn esimi Aısha bıbi saıramdyq ataqty Musa sheıhtyń qyzy bolǵan. Aısha bıbi ómir súrgen HІ ǵasyrda ólkemizde ǵylym men ónerdiń, mádenıettiń damyǵan kezi bolatyn. Uly ǵulama Qoja Ahmettiń anasy óz dáýiriniń kózi ashyq, ádepti, bilimdi áıelderiniń biri bolǵan. Qarashash Anany búkil túrik álemi ardaq tutady. Ol izgi analyqtyń sımvoly ispettes.
Qarashash Ananyń qabirstanynda ol kisige qatysty Ibrahım qoja, Súleımen qoja, Sálim qoja jáne Dáýit qoja syndy jandardyń da qabirleri qoıylǵan.
Derek kózi:
Qazaqstan ulttyq entsıklopedııasy 5 tom
