Qarashanyń sońyna deıin elordada 55 jyly aıaldama salynady
ASTANA. QazAqparat - Qarashanyń sońyna deıin elordada 55 jyly aıaldama paıda bolady. Búginge deıin 22 jabyq tıpti pavılon paıdalanýǵa berildi, dep habarlaıdy Astana ákimdiginiń resmı saıty.
2018 jyly qoǵamdyq kólikter kórsetetin qyzmetterdiń sapasyn joǵarylatý maqsatynda kólik jáne jol-kólik ınfraqurylymyn damytý basqarmasy 55 jabyq tıpti pavılondardy (jyly aıaldamany) ornatý jumystaryn júrgizip jatyr.
«55 pavılonnyń barlyǵy ornatyldy. Olardyń 22-si paıdalanýǵa berildi. Paıdalanýǵa berilgen pavılondar kondıtsıoner júıesimen, jylytqyshpen, Wi-Fi jelisimen, beıne-baqylaý júıesimen jabdyqtalǵan. 33 aıaldama pavılony boıynsha iske qosý jumystary bekitilgen kestege sáıkes júrgizilip jatyr», - delingen vedomstvonyń habarlamasynda.
Basqarmada atap ótkendeı, kúnine Astanada 5-7 jabyq tıpti pavılon paıdalanýǵa beriledi. Jospar boıynsha jyly aıaldamalardy ornatý jumystary 25 qarashaǵa deıin aıaqtalmaq.
