Qarashanyń basynda kún sýytady - Qazgıdromet
NUR-SULTAN. QazAqparat - Sınoptıkter 31 qazan – 2 qarashaǵa arnalǵan aýa raıy boljamyn jarııalady, dep habarlaıdy QazAqparat.
Qazgıdromettiń habarlaýynsha, Reseıdiń Eýropalyq bóliginde kezekti tsıklon qalyptasyp, belsendiligi artady. Aldaǵy táýlikte ol Oralǵa qaraı jyljıdy, onymen baılanysty sýyq aýa aǵyndary Qazaqstannyń batys jáne soltústik-batys aımaqtaryna yǵysady. Tsıklon jáne aýa aǵyndarynyń shyǵysqa qaraı jyljýyna baılanysty jańbyr jáne qar aralas jańbyr jaýyp, qatty jel soǵady, keı jerlerde burqasyn bolyp, respýblıkanyń qalǵan óńirlerinde de kóktaıǵaq bolady.
«Sońǵy kúnderi aýa temperatýrasy klımattyq normadan 3…6°S, respýblıkanyń soltústiginde 8…13°S joǵary boldy. Sınoptıkterdiń aıtýynsha, endi birtindep kún sýytady. Boljam boıynsha, qarasha aıynyń basynda batys óńirlerde aýa temperatýrasy ortasha kópjyldyq normadan 2…4°S tómen bolady», - delingen habarlamada.
