Qarashanyń basy munaı baǵasynyń tómendeýimen bastaldy
ALMATY. KAZINFORM — 2 qarashada álemdik munaı arzandady.
2 qarasha kúni tańerteńgi jaǵdaı boıynsha Brent markaly munaı fıýchersteriniń baǵasy barreline 110,37 dollar boldy. Bul aldyńǵy kórsetkishten 3,06 dollarǵa nemese 2,70%-ǵa tómen.
Oilprice.com málimetinshe, amerıkalyq WTI markaly munaıdyń baǵasy 3 dollarǵa (2,88%) arzandap, barreline 101,12 dollarǵa deıin tústi.
Reseılik Urals markaly munaıdyń baǵasy da tómendedi. Onyń quny barreline 102,94 dollarǵa jetti. Bul aldyńǵy kórsetkishten 7,54 dollarǵa nemese 6,82%-ǵa az.
Munaı baǵasyna Iran men Katar resmı ókilderiniń kelissózderi qysym jasady.
Iran Syrtqy ister mınıstri Abbas Arakchıdiń habarlaýynsha, onyń orynbasarlary bastaǵan Iran delegatsııasy Katar men Pákistannan kelgen deldaldarmen konsýltatsııalardy jalǵastyrý úshin Dohaǵa attanǵan.
Buǵan qosa, Ormýz buǵazy arqyly ótetin munaı tankerlerine jasalǵan shabýyldar da alańdaýshylyq týǵyzyp otyr.
Ulybrıtanııa Áskerı-teńiz kúshteriniń Teńiz saýda tasymaldaryn úılestirý ortalyǵy (UKMTO) Parsy shyǵanaǵynda tankerge oq atylǵanyn habarlady.
Buǵan deıin Iran Ormýz buǵazynda amerıkalyq barlaý ushqyshsyz ushý apparatyn ustap alǵanyn málimdegen edi.
