Qarashyǵanaqtan gaz óńdeý jobasynyń taǵdyry qazan men qarashada sheshiledi – Energetıka mınıstrligi

ASTANA. KAZINFORM – Qarashyǵanaqta gaz óńdeý zaýytyn salý jobasynyń ınvestıtsııalyq keleshegine qatysty 2025 jyldyń qazan-qarashasynda túpkilikti sheshim qabyldanady. Energetıka mınıstrligi Reuters-tiń resmı saýalyna osylaı dep jaýap bergen.

Mınıstrliktiń baspasóz qyzmeti bul málimetti rastap otyr. Naqtyraq aıtsaq, jobanyń tóńiregindegi kelissóz 2022 jyldyń jeltoqsan aıynan bastap júrgizilgen.

- Túpkilikti ınvestıtsııalyq sheshim qabyldaý 2025 jyldyń qazan-qarashasyna josparlanǵan. Osylaısha qazirgi tańda aktsıonerler jobany birlesip júzege asyrýdan bas tartatyny týraly ustanym bildirgen joq.

Teris ınvestıtsııalyq sheshim bolǵan jaǵdaıda Qazaqstan tarapy jobany «QazMunaıGaz» ulttyq kompanııasy arqyly nemese balama úshinshi tarapty tartý arqyly iske asyrý jolyn qarastyrady, - dep jazylǵan resmı jaýapta.

Buǵan deıin Qarashyǵanaq aktsıonerleri gaz óńdeý zaýytyn salýǵa Qazaqstannan qosymsha $1 mlrd talap etkenin jazǵan edik.

Aıta ketý kerek, «Qarashyǵanaq Petroleým Opereıtıng B.V.» konsortsıýmyna Shell (29.25%), Eni (29.25%), Chevron (18%), LÝKOIL (13.5%), QazMunaıGaz (10%) ıelik etedi.