Qarashadan bastap jumystan bosatýǵa moratorıı engiziletini ras pa
ASTANA. KAZINFORM — Messendjerlerde jumystan bosatýǵa jáne kadrlyq aýys-túıisterge qatysty «moratorıı» engiziletini týraly jalǵan aqparat taralyp jatyr.
Jalǵan aqparatqa qarsy is-qımyl ortalyǵy messendjerlerdegi chattarda 2026 jylǵy qarasha aıynan 2027 jylǵy aqpan aıyna deıin Qazaqstan Respýblıkasynyń quqyq qorǵaý jáne arnaýly memlekettik organdarynyń, sondaı-aq Qarýly Kúshteriniń qyzmetkerlerin jumystan bosatýǵa jáne kadrlyq aýys-túıisterge tolyq tyıym salynady degen mazmundaǵy mátinniń taralýyn anyqtady.
Aqparattyń shynaıylyǵyna kóz jetkizý úshin onyń avtorlary Qazaqstan Respýblıkasynyń 2026 jylǵy 3 maýsymdaǵy № 295-VIII «Qazaqstan Respýblıkasynyń eńbek zańnamasyn jetildirý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» Zańyna silteme jasaǵan.
— Atalǵan zańnyń bar ekeni ras bolǵanymen, onda mundaı erejeler kózdelmegen. Zańda kórsetilgen kezeńge jumystan bosatýǵa, aýystyrýǵa, taǵaıyndaýǵa nemese ózge de kadrlyq aýys-túıisterge moratorıı engizý týraly normalar joq. Aqparattyń shynaıy emestiginiń taǵy bir belgisi — taratylyp jatqan mátinde qujattyń mindetti derektemeleriniń kórsetilmeýi. Atap aıtqanda, ókim shyǵarǵan memlekettik organ, qujattyń kúni men nómiri, moratorıı engizýge negiz bolatyn zańnamanyń naqty normasy, sondaı-aq tapsyrma kimniń atynan berilgeni kórsetilmegen. Osylaısha, bul jaǵdaıda naqty normatıvtik quqyqtyq akt onyń quramynda joq aqparattyń shynaıylyǵyna kóz jetkizý quraly retinde paıdalanylǵan, — delingen habarlamada.
Vedomstvo osyndaı habarlamalardy derekkózi men qujattyń derektemelerin resmı memlekettik aqparattyq resýrstar arqyly teksermeı taratpaýǵa shaqyrdy.
Buǵan deıin jalǵan aqparatqa qarsy ortalyq jarty jylda 68 feıkti joqqa shyǵarǵanyn jazǵanbyz.
