Qarashadan bastap «Qazaqstan» ulttyq arnasynda túrli etnos ókilderiniń qatysýymen «Qazaqsha sóıleımiz» oıyn-saýyq baǵdarlamasy efırge shyǵady

   Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda «Memlekettik tildi damytýdaǵy problemalar týraly» máseleni talqylaý barysynda Mádenıet jáne aqparat vıtse-mınıstri Arman Qyryqbaev  málim etti.

«Memlekettik tildiń keńinen qoldanylýyn qamtý úshin onyń abyroı-bedelin, sondaı-aq oǵan degen qajettilik pen suranysty keńeıtý jumystaryn jandandyrý qajet. Bul rette basty qural BAQ-pen jumys. Munda da memlekettik tildegi otandyq kontenttiń básekege qabilettiligin kóterý baǵytynda josparly jumystar júrip jatyr», - deıdi Arman Qyryqbaev.

Bul rette vıtse-mınıstr byltyrǵy jyldyń sońynan memlekettik tildegi baǵdarlamalar úlesi 80 paıyzdy quraıtyn «Mádenıet» telearnasy efırge shyqqanyn, al aǵymdaǵy jyly «Balapan» telearnasynyń kórsetilimi 5 saǵatqa ulǵaıtylǵanyn aıtty. Budan bólek, bıylǵy 1 qyrkúıekten bastap kórsetiliminiń jartysynan kóbi memlekettik tilde qamtamasyz etiletin aqparattyq «KZ.24» jáne aǵartýshylyq «Bilim» atty eki telearna efırge shyqqan bolatyn.

«Qarashadan bastap «Qazaqstan» telearnasynda memlekettik tildi jetik meńgergen ártúrli etnos ókilderiniń qatysýymen «Qazaqsha sóıleımiz» atty oıyn-saýyq baǵdarlamasy efırge shyǵatyn bolady», - dedi ol.