Qarashadan bastap "Eýrazııa taýar júıesi" taýar bırjasynda alǵash ret altynǵa eseptik fıýcherstik kelisimsharttar jasala bastaıdy
ALMATY. Qazannyń 26-sy. QazAqparat /Erlik Erjanuly/- 2011 jyly "Eýrazııa taýar júıesi" taýar bırjasynda munaı ónimderi, metaldar, óndiristik taýarlar sektsııasy ashylady. Bul búgin QR Almaty qalasyndaǵy Óńirlik qarjy ortalyǵy qyzmetin retteý agenttiginiń 2010 jylǵy 9 aıdaǵy atqarǵan qyzmetiniń qorytyndysyna arnalǵan baspasóz máslıhatynda aıtyldy.
Almaty qalasy óńirlik qarjy ortalyǵy qyzmetin retteý agenttiginiń tóraǵasy Árken Arystanovtyń aıtýynsha, bıyl "Eýrazııa taýar júıesi" taýar bırjasy aıtarlyqtaı nátıjelerge qol jetkizdi. Onda qazirgi tańda aýylsharýashylyǵy ónimderi sektsııasy boıynsha 7 túrli taýarmen saýda-sattyq júrgizýge múmkindik týyp otyr. Olar: bıdaı, qara bıdaı, arpa, kúnbaǵys dánderi, kúnbaǵys maıy men un.
"Endi, qarasha aıyndaǵy qarjygerlerdiń kásibı merekesi qarsańynda merzimdik saýda sektsııasy sheńberinde birinshi ret altynǵa eseptik fıýcherstik kelisimsharttar jasalatyn bolady. Al kelesi jyly birqatar jańa sektsııalar ashylady. Sondaı-aq Kıot hattamasyna sáıkes kómirtegi bólshekterimen saýda-sattyq uıymdastyrý da josparlanýda", - deıdi Á. Arystanov.
