Qarashada jyldyq ınflıatsııa 7,3 paıyzǵa deıin artty
NUR-SULTAN. QazAqparat - Qarashada jyldyq ınflıatsııa 7,1 paıyzdan 7,3 paıyzǵa artty. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
«Azyq-túlik ınflıatsııasy baǵanyń jalpy ósýine eń kóp úles qosýda. Ósimdik maıy, qant sekildi jekelegen tamaq ónimderi naryqtaryndaǵy teńgerimsizdik kúsheıip, azyq-túlik taýarlary baǵasynyń jyldyq ósýi 10,7 paıyzdan 10,8 paıyzǵa deıin ulǵaıdy», - dedi Erbolat Dosaev.
Ulttyq bank tóraǵasynyń aıtýynsha, kıim baǵasynyń 4,7% ósýinen azyq-túlikke jatpaıtyn ınflıatsııa 5,6%-dan 5,7%-ǵa deıin údedi. TKSh retteletin qyzmeti, mádenıet jáne demalys salasyndaǵy qyzmet baǵasynyń ósýinen aqyly qyzmet ınflıatsııasy 3,7%-dan 4,1%-ǵa deıin údedi.
Sonymen birge, E.Dosaevtyń aıtýynsha, Qazaqstanda iskerlik belsendilik ındeksi qarasha aıynda 48,8-den 49,4-ke deıin ósti. Bul qurylys kórsetkishiniń 52,5-ke deıin 4,9 tarmaqqa joǵarylaýymen baılanysty. Ónerkásip pen qyzmet kórsetý salasynda jaǵdaı ózgergen joq, mundaǵy ındekster 49,6 jáne 48,7-ni qurady.
