Qarashada janar-jaǵarmaı baǵasy qymbattamaıdy
ASTANA. 1 qarasha. QazAqparat - Aǵymdaǵy qarasha aıynda elimizde munaı ónimderiniń baǵasy qymbattamaıdy. Bul týraly búgin brıfıng barysynda QR Tabıǵı monopolııalardy retteý agenttiginiń tóraǵasy Murat Ospanov málim etti.
Agenttik basshysynyń aıtýynsha, qarasha aıynda elimizde sý, elektr energııasy, jylýmen jáne gazben qamtý tarıfteri men janar-jaǵarmaı baǵasy óspeıdi. «Al qazan aıynda janarmaı baǵasynyń qymbattaýyna negizinen naryqtaǵy tapshylyq áser etti. Atap aıtqanda, qazan aıynda AI-92 jáne AI-93 markaly benzın tapshylyǵy sezildi. Sebebi, biz onyń 40 paıyzyn Reseıden ımporttap otyrmyz. Qazirgi ýaqytta bizde Munaı jáne gaz mınıstrliginiń elimizdegi zaýyttar tutynýshylarymyzdyń barlyq suranysyn óteıtindigi týraly haty bar. Sondyqtan da ótken aıda tapshylyqtyń aldyn alý úshin, Reseıden janarmaıdyń durys tasymalyn qamtamasyz etý úshin biz ótken aıda benzınge baǵany 115 teńgege kóterdik», - dedi Murat Ospanov.
Eske salsaq, ótken aıda elimizdegi AI-92, AI-93 markaly benzın 5 teńgege qymbattaǵan bolatyn.
