Qarashada tótenshe jaǵdaıǵa tap bolǵan 533 adam qutqaryldy
NUR-SULTAN. QazAqparat - Bıyl azamattyq qorǵanys organdarynyń bólimshelerin jaraqtandyrýǵa respýblıkalyq jáne jergilikti bıýdjetterdiń esebinen 353 tehnıka satyp alyndy. Bul týraly búgin QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
«Qysqy kezeńde el aýmaǵy tabıǵı jáne tehnogendik sıpattaǵy tótenshe jaǵdaılarǵa ushyraıtynyn taldaý kórsetip otyr. Qysta adamdardyń oqystan qaza tabýyna jol bermeý jáne tótenshe jaǵdaılardan keletin zalaldy azaıtýǵa baǵyttalǵan is-sharalar kesheni anyqtaldy», - dedi ol.
Onyń dereginshe, qarasha aıynda tótenshe jaǵdaılar men oqıǵalardy joıý úshin TJK bólimsheleri 4 719 ret arnaıy shaqyrýmen oqıǵa ornyna attandy (órtterge – 1292, janý jaǵdaılaryna - 1813, avarııalyq-qutqarý jumystaryna - 894, izdestirý-qutqarý jumystaryna – 99, basqa sharalarǵa – 579, jalǵan - 42).
«Bul rette 533 adam qutqaryldy, onyń ishinde balalar – 120. Qaýipsiz jerge shyǵarylǵan 1 876 adamnyń ishinde 810 bala boldy», - dedi V.Bekker.
Komıtet basshysynyń aıtýynsha, qarashada aýa raıynyń nasharlaýynan 15 ret avtojoldar jabyldy. Shyǵys Qazaqstan oblysynda joldyń jekelegen ýchaskesindegi qalyptasqan jaǵdaıǵa baılanysty 2 saǵattan 20 saǵatqa deıin kólik quraldarynyń qozǵalysyna 28 ret shekteý engizildi.
