Qarashada teńge 2,4%-ǵa nyǵaıdy – Ulttyq bank

Qarashanyń qorytyndysy boıynsha teńge baǵamy bir AQSh dollary úshin 458,24 teńgege deıin 2,4%-ǵa nyǵaıdy, dep habarlaıdy Kazinform QR Ulttyq bankiniń resmı saıtyna silteme jasap.

Qazaqstan qor bırjasyndaǵy saýda-sattyqtyń bir kúndegi ortasha kólemi bir aıda 155-ten 192 mln AQSh dollaryna deıin ulǵaıdy. Saýda-sattyqtyń jalpy kólemi 4,2 mlrd AQSh dollaryn qurady.

Qarajatty respýblıkalyq bıýdjetke jiberý úshin Ulttyq qordan transfertterdi qamtamasyz etý jáne «QazMunaıGaz» UK AQ aktsııalaryn satyp alý úshin qarashada 1320 mln AQSh dollary mólsherinde valıýta satyldy. Ulttyq qordan satý úlesi saýda-sattyqtyń jalpy kóleminen 31% boldy jáne bir kúnde 60 mln AQSh dollarynan aspady. Ulttyq qordyń qarajatymen operatsııalar júrgizý kezinde Ulttyq Bank naryqtyq beıtaraptyq qaǵıdatyn saqtaıdy, bul shetel valıýtasyn turaqty jáne birkelki satýdy bildiredi. Osy praktıka Ulttyq qor operatsııalarynyń valıýta naryǵyna áserin barynsha azaıtýǵa múmkindik beredi.

BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda Ulttyq Bank qarashada bırjalyq saýda-sattyqta shetel valıýtasyn satyp alýdy jalǵastyrdy, onyń jalpy somasy 200 mln AQSh dollary nemese naryqtyń jalpy kóleminen shamamen 5%-yn qurady.

Ulttyq Bank «Qazaqstannyń depozıtterge kepildik berý qory» AQ (QDKQ) aktıvteriniń valıýtalyq úlesin ulǵaıtý maqsatynda qarashada 70 mln AQSh dollary mólsherinde valıýtany satyp aldy.

Ulttyq Bank qarashada valıýtalyq ınterventsııalar júrgizgen joq.