Qarashada Mańǵystaý oblysynda azyq-túlik baǵasy 31 paıyzǵa deıin ósken

ASTANA. QazAqparat - Qarasha aıynda eldegi jyldyq ınflıatsııa údep, 19,6% (qazanda – 18,8%) boldy. Aımaqtar arasynda jyldyq ınflıatsııa 19 óńirde qarqyn aldy. Al 1 óńirde (Abaı oblysy) 19,5% deńgeıinde ózgerissiz qaldy, dep habarlaıdy QazAqparat Ulttyq bankke silteme jasap.

Jyldyq ınflıatsııanyń meıilinshe joǵary máni Mańǵystaý oblysynda (23,8%), Astana qalasynda (22,6%) jáne Aqmola oblysynda (21,0%) tirkelgen.

«Azyq-túlik baǵasynyń ósý qarqyny qarashada 24,1%-ǵa deıin (qazanda – 23,1%) jedeldedi. Osy topqa jatatyn taýarlardyń baǵasy Mańǵystaý oblysynda aıtarlyqtaı ósti (31,4%).

Azyq-túlikke jatpaıtyn taýarlar baǵasynyń ósý qarqyny j/j 18,6%-ǵa deıin jedeldedi (qazanda – 17,9%). Eń joǵary mán Astana qalasynda (28,8%), eń tómengi mán Almaty oblysynda (15,8%) tirkeldi», - dedi Ulttyq banktiń Aqsha-kredıt saıasaty departamenti naqty sektor monıtorıngi basqarmasynyń bastyǵy Igor Osıpov.

Aqyly qyzmet kórsetý baǵasy qarashada 14,1%-ǵa ósken, bul rette baǵa Mańǵystaý oblysynda (18,0%) jalpy respýblıkalyq deńgeıden edáýir joǵary, Aqtóbe oblysynda (10,8%) edáýir tómen boldy.

Igor Osıpov 2022 jylǵy qarashada eldegi aılyq ınflıatsııa 1,4% quraǵanyn aıtty, bul sońǵy 5 jyldaǵy (2017-2021 jyldary: 0,8%) qarasha aıyndaǵy ınflıatsııanyń ortasha máninen edáýir joǵary.

Barlyq óńirde baǵa 2022 jylǵy qarashada ortasha tarıhı normadan joǵary boldy. Aılyq ınflıatsııanyń eń kóp máni Aqmola oblysynda baıqaldy (2,0%).