Qarashada qazaq tilin úıretetin JI-agent iske qosylady

ASTANA. KAZINFORM — Elimizde qazaq tilin úıretetin JI-agent ázirlenip jatyr. Bul týraly «Jibek joly» telearnasyndaǵy «Búgin LIVE» baǵdarlamasynda Sh. Shaıahmetov atyndaǵy «Til Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı aıtty.

— Aldaǵy ýaqytta biz jasap jatqan JI-agent qazaq tilin úırete bastaıdy. Sondaı-aq ol qoldanýshynyń qazaq tilin bilý deńgeıin anyqtap, oǵan arnalǵan jeke baǵdarlamany ázirlep beredi. Onyń alǵashqy nusqasy qarasha aıynda iske qosylady. Keıin ol jyl saıyn jetildirilip otyratyn bolady, — dedi ol.

Odan bólek, spıker bul jasandy ıntellektiniń eń basty qasıeti onyń beıimshildigine ekenin atap ótti. 

— Til úırenýshi kádimgi adammen sóılesip otyrǵandaı oǵan saýalyn qoıady, ol jaýap beredi. Qoldanýy óte qarapaıym. Sol 5-6 suraqtyń aıasynda ol qoldanýshynyń tildi meńgerý deńgeıin anyqtap alady. Sodan keıin qazaq tilin aqyryndap-aqyryndap, oınap, sýretter salyp berip — qoldanýshyny qınamaı úıretetin bolady. Bizdiń oıymyzsha, bul qazaq tilinen sabaq beretin muǵalimderge taptyrmas kómekshi quralǵa aınalady, — dep atap ótti Maqpal Jumabaı.

Eske sala ketsek, buǵan deıin spıker qazaq tili birtindep tehnologııanyń tiline aınalyp kele jatqanyn aıtqan edi.