Qarashada Almatyda estetıkalyq gımnastıkadan álem chempıonaty ótedi
ASTANA. QazAqparat – Qazaqstan toptyq estetıkalyq gımnastıka federatsııasynyń vıtse-prezıdenti Áıgerim Arpabaeva Almatyda ótetin álem chempıonatynda neshe medal sarapqa túsetinin aıtty, dep habarlaıdy QazAqparat tilshisi.
Federatsııa ókiliniń aıtýynsha, 24-26 qarasha aralyǵynda Almaty qalasynda toptyq estetıkalyq gımnastıkadan birneshe iri halyqaralyq týrnır ótedi.
Atap aıtsaq, Álem chempıonaty, Jasóspirimder arasyndaǵy álem chempıonaty jáne IFAGG Trophy 2023 týrnıri, Tórt qurlyq chempıonaty men «Almaty Cup» halyqaralyq týrnıri uıymdastyrylady.
Jarysty Toptyq estetıkalyq gımnastıkanyń halyqaralyq federatsııasy (IFAGG) men Qazaqstannyń Mádenıet jáne sport mınıstrligi uıymdastyryp otyr.
«Jarystar Balýan Sholaq atyndaǵy sport saraıynda ótedi. Sporttyń bul túrinen jylyna bir ret bolatyn álem chempıonatyn Azııa boıynsha birinshi bolyp Almaty qabyldap otyr. Jarysqa álemniń 15-ten atsam eldiń eń myqty komandalary qatysady. ıAǵnı, elimizge 1500-ge jýyq sportshy, jattyqtyrýshy, tóreshi keledi. Qazirdiń ózinde túrli elderdiń komandalary habarlasyp jatyr. Olardyń ishinde AQSh sportshylary da bar. Bılet alyp, daıyn otyrǵandaryn aıtty. Jarys aıasynda uzaq jáne qysqa baǵdarlamalarda, ártúrli jas sanattarynda jáne aralas komandalar arasynda 50 medal jıyntyǵy sarapqa túsedi», - dedi Áıgerim Arpabaeva ortalyq kommýnıkatsııalar qyzmetinde ótken brıfıngide.
Toptyq estetıkalyq gımnastıkany jankúıerleri sınhrondy júzýdiń qurlyqtaǵy nusqasy dep te ataıdy.
Qazylar toptyń ónerin jattyǵýlardyń qıyndyǵy men minsizdigi, qoıylymnyń mazmuny men oryndaýshylardyń ártistik qabileti boıynsha baǵalaıdy.
Qazaqstan toptyq estetıkalyq gımnastıka federatsııasy 2018 jyldan beri jumys isteıdi. Bul federatsııanyń 13 óńirde bólimshesi bar.
Respýblıka boıynsha atalǵan sport túrimen 1500-den astam sportshy aınalysady.
Ulttyq qurama komanda sapynda 173 gımnast bar. Olardy 86 jattyqtyrýshy men horeograf baýlyp júr.
