Qarashada 2026 jylǵy kóktemgi egis jumystaryn qarjylandyrý iske qosylady

ASTANA. KAZINFORM – 2026 jylǵy kóktemgi egis jumystaryn erte qarjylandyrý aldaǵy qarasha aıynda iske qosylady. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

- Ózderińiz biletindeı, negizgi agrotehnıkalyq sharalardyń biri – bul jer jyrtý jáne tyńaıtqysh kólemin engizý asa mańyzdy. Bıyl jospar boıynsha 1,9 mln tonna tyńaıtqysh bolsa, búgingi kúni sonyń 1,8 mln tonnasy engizildi. Sonymen qatar, Úkimet rezervinen avanstyq tólem retinde bólingen bos qarajat zaýyttarda áli de tur. Osyǵan baılanysty ákimdikter kúzgi agrotehnıkalyq jumystar aıasynda tyńaıtqysh engizýdiń josparly kórsetkishterine qol jetkizýdi qamtamasyz etý qajet, - dedi Aıdarbek Saparov.

Sonymen qatar mınıstr kóktemgi egis jáne egin jınaý jumystaryn jeńildetilgen qarjylandyrýǵa toqtaldy.

- Bólingen 700 mlrd teńgeniń kóktemgi egis jumystaryna 502 mlrd teńgesi ıgerilip, 9 mln gektar egis alqaby qamtyldy. Qalǵan qarajat esebinen egin jınaý jumystaryn qarjylandyrý jalǵasýda. Memleket basshysynyń tapsyrmasyna sáıkes, 2026 jylǵy kóktemgi egis jumystaryn erte qarjylandyrý aldymyzdaǵy qarasha aıynda iske qosylatyn bolady. Jeńildetilgen lızıngke bólingen 250 mlrd teńgeniń búgingi kúni 8 myńnan astam aýyl sharýashylyǵy tehnıkasyn satyp alýǵa 253 mlrd teńgege ótinim berildi. «Damý» qorynyń jelisi boıynsha kepil bazasy jetkiliksiz fermerler úshin qaryz somasynyń 85 paıyz mólsherinde kepildik berý baǵdarlamasyn iske asyrý jalǵasýda, - dedi ol. 

Aıta keteıik, otyrys qorytyndysy boıynsha ótetin baspasóz konferentsııasynda Aýyl sharýashylyǵy mınıstri Aıdarbek Saparov pen Saýda jáne ıntegratsııa mınıstri Arman Shaqqalıev BAQ ókilderi tarapynan týyndaǵan saýaldarǵa jaýap beredi.