Qarasha men jeltoqsanda 196 mal urysy ustaldy

«Mal urysy» jedel-profılaktıkalyq is-sharasy barysynda 196 mal urysy quryqtaldy, dep habarlaıdy Kazinform Polisia.kz-ke silteme jasap.

Qazaqstanda qysqy merzimde soǵym et daıyndaý dástúri qalyptasqan. Biraq dál osy ýaqytta mal urlyǵy da jıileıtinin atap ótken jón. Osyǵan baılanysty jyl saıyn Іshki ister mınıstrligi mal urlyǵynyń aldyn alý jáne oǵan qarsy kúresti arttyrý boıynsha sharalar qabyldaıdy.

Jeltoqsan jáne qarasha aılarynda barlyq óńirde «Mal urlyǵy» eki kezeńdik respýblıkalyq jedel-aldyn alý is-sharasy uıymdastyryldy. Operatsııany júrgizýge tek polıtseıler ǵana emes, veterınarııalyq baqylaý men jergilikti atqarýshy organdardyń qyzmetkerleri de jumyldyryldy.

Birlesken is-sharalardyń nátıjesinde 196 mal urysy jáne 34 qylmystyq top ustaldy. Máselen, Aqmola oblysynda eki adamnan turatyn qylmystyq top ustaldy. Olar qarasha aıynan bastap qoralar men saraılardan 20 bas usaq maldy urlap áketken. Qaskóıler negizi elordada turǵan, buryn qylmystyq jaýapkershilikke tartylmaǵan, sol sebepti de quqyq qorǵaý organdarynyń nazaryna ilikpegen.

Osylaısha kúdiktiler Aqmola oblysynyń aýmaǵynda ornalasqan dalaly aımaqqa úsh ret kelip, maldy urlaǵan soń, ony soıyp, etin Astana qalasynyń bazarlarynda satyp jibergen.

Polıtseıler kúdikti kólikti baıqaǵannan keıin ǵana urylar Talapker aýylynda tórtinshi urlyqty jasaý barysynda quryqtaldy. Ýaqtyly qabyldanǵan sharalar nátıjesinde bıyl mal urlyǵy 13%-ǵa tómendep otyr. Sonymen qatar urlanǵan janýarlardyń jartysynan kóbi zańdy ıelerine qaıtaryldy.

Qylmystyq qolsuǵýshylyqtyń qurbany bolmaý úshin qarapaıym erejelerdi ustaný qajet: — qoıshynyń qaraýynsyz maldy qaldyrmańyz. Siz, ol jáne ákimshilik arasynda úsh jaqty shart jasańyz;

— qazirgi kezde keń taralǵan tehnıkalyq qurylǵylardy, maldy baqylaýdyń zamanaýı ádisterin qoldanyńyz;

— maldy tańbalaýdy nemese chıpteýdi umytpańyz, bul bolashaqta mal izdeýde jáne ıesin anyqtaýda kómektesedi.