Qarasha bastalǵaly kóktaıǵaqqa baılanysty jol jeti ret jabylǵan – ІІM
NUR-SULTAN. QazAqparat – QR ІІM ákimshilik polıtsııa komıteti tóraǵasynyń orynbasary Serik Túsipov qystygúni alys jolǵa shyǵatyn kólik júrgizýshilerine abaı bolýdy eskertti, dep habarlaıdy QazAqparat tilshisi.
«Qysta kólik júrgizýdiń óz ereksheligi bar. Birinshiden, aýa raıynyń ózgerýine baılanysty abaı bolǵan abzal. Qazaqstannyń klımaty shuǵyl ózgeretindikten, júrgizýshiler jol ústinde daıyn bolýy kerek. Mysaly, eldiń ortalyq, soltústik jáne batys aımaqtarynda boran soǵyp, aıaz uıytqyp, jol kóktaıǵaq bolyp turady. Osynyń saldarynan qozǵalysty shektep, joldy tazartýǵa biraz ýaqyt jumsalady. Al ońtústik jáne shyǵys jaq taýly keletindikten, joldy qar basyp, tuman jıi túsedi», - dedi ІІM baspasóz máslıhatynda Serik Túsipov.
Osyǵan baılanysty júrgizýshiler aımaqtardyń aýa raıy boıynsha aıyrmashylyqtaryn eskere otyryp, sınoptıkterdiń habarlamalaryn qadaǵalap otyrýy tıis. Jolǵa shyǵýdy josparlaǵanda saq bolǵan abzal.
«Alys jolda kele jatyp aýa raıy buzylyp ketse jaqyn jerdegi eldimekenge jetip alyp, kún raıynyń saıabyrlaǵanyn kútińiz. Al eger avtokólikte qalǵanym jón dep sheshseńiz, mindetti túrde qutqarý qyzmetine habar berý kerek. Qarasha aıy bastalǵaly aımaqtarda kóktaıǵaqqa baılanysty jol jeti ret jabyldy. Al 2019 jyly avtokólik qozǵalysy 985 ret shektelgen bolatyn», - deıdi ol.
