Qarasha aıynda turǵyn úılerdiń baǵasy ósti
ASTANA. 11 jeltoqsan. QazAqparat - 2013 jylǵy qarashada ótken aımen salystyrǵanda kórkeıtilgen turǵyn úılerdi jalǵa berýdiń baǵalary 0,7%-ǵa, jańa turǵyn úılerdi satý 0,3 paıyzǵa ósti.
Budan bólek, Kórkeıtilmegen turǵyn úılerdi alyp satý baǵasy 0,3%, kórkeıtilgen turǵyn úılerdi alyp satýdyń baǵasy 0,2%-ǵa artqan. Bul týraly Statıstıka agenttiginiń baspasóz qyzmetinen habarlandy.
Agenttik málimetterine qaraǵanda, jańa turǵyn úılerdi satý baǵasy 2013 jyldyń qańtar-qarasha aılarynda 2012 jyldyń qańtar-qarasha aılaryna salystyrǵanda 10,4 paıyzǵa ósken. Budan bólek, 2013 jyldyń qarashasynda elimizdiń turǵyn úı naryǵynda baǵa ortasha alǵanda jańa turǵyn úılerde 1 sharshy metrine 188 myń 279 teńgeni quraǵan. Al kórkeıtilgen turǵyn úılerdegi sharshy metr baǵasy ortasha 146 myń 449 teńgeni, odan tómengi sanattaǵy turǵyn úılerde 84 myń 917 teńgege jetti.
Sonymen birge, esepti kezeńde kórkeıtilgen turǵyn úılerdi jalǵa berý sharshy metrine shaqqanda 1 myń 92 teńgeni quraǵan.
