Qarasha aıynda Shymkentte bokstan QR chempıonaty ótedi
«Qazaqstan boks federatsııasy 2020 jylǵy ulttyq chempıonatty ótkizetin qala retinde Shymkentti tańdady. Erler men áıelder bir ýaqytta qatysatyn chempıonat 23-29 qarasha aralyǵynda ótedi. Shymkentte respýblıkalyq jarystardy uıymdastyra alatyndaı mol tájirıbe bar. Biz chempıonattyń oıdaǵydaı ótetinine senimdimiz», - dedi QBF prezıdenti Keńes Raqyshev.
Shymkentte 2017 jyly erler arasyndaǵy el chempıonaty ótken bolatyn. Sondaı-aq 2019 jyly áıelderdiń bokstan 5-shi Jazǵy spartakıadasy men jastar arasyndaǵy el chempıonaty da osy qalada uıymdastyrylǵan edi.
Búgingi kúni koronavırýsty taratpaý jónindegi vedomstvoaralyq komıssııanyń málimetteri boıynsha, Shymkent jáne Túrkistan oblysy turaqty epıdemıologııalyq ahýaly bar «jasyl aımaqqa» engizilgen. Ol qala men óńirde ınfektsııa eń az tirkelgen.
«Biz chempıonatty ótkizý úshin Shymkenttiń bas sanıtarlyq dárigerinen ruqsat aldyq. Barlyq oblystardan komandalardy qabyldaýǵa daıyndalyp jatyrmyz. Bul aımaqtyq erler men áıelder komandalary qatysatyn alǵashqy biryńǵaı chempıonat bolmaq. Ókinishke qaraı, biz kórermenderdi shaqyra almaımyz. Áıtse de olar barlyq jekpe-jekti kórýge múmkindik alady. Bizdiń federatsııa, árıne, komandalardyń da, jankúıerlerdiń de kóńilinen shyǵýy úshin jarystardy joǵary deńgeıde ótkizý úshin bárin jasaıdy», - dedi Shymkent boks federatsııasynyń atqarýshy dırektory Rahmanbek Arǵymbaev.
Chempıonat Qazsport telearnasynan kórsetiledi. Uıymdastyrýshylardyń sharttaryna sáıkes, komandanyń barlyq músheleri baıqaý bastalǵanǵa deıin COVID-19 vırýsy boıynsha test tapsyrýy kerek.