Qarasha aıynda Astana Operada qandaı áýender shyrqalady

3 qarasha kúni saǵat 12.00-de balalarǵa arnalǵan «Túrli daýystar álemi» kontserti jetkinshekterdi operalyq vokalmen tanystyrady. Mýzykatanýshy Marjan Jákenova sopranodan bastap basqa deıingi opera daýystarynyń barlyq túri týraly qyzyqty da tanymdy túrde áńgimelese, teatr solısteri V.A.Motsart, Dj.Rossını, Dj.Verdı, R.Leonkavallo, J.Bıze, L.Hamıdıdiń týyndylarynan tanymal arııalar men dýetterdi, neapolıtandyq ánder men t.b. shyǵarmalardy oryndaıdy. Sonymen qatar baǵdarlamaǵa «Astana Opera» balalar teatrlyq stýdııasynyń hory qatysady. Fortepıano partııasynda – Raýshan Beskembırova, balalar horynyń jetekshisi – Altynǵanym Ahmetova.

8 qarasha saǵat 19.00-de «Qos tústi perneden tógilgen ǵajaıyp» atty fortepıanolyq dýetter keshi ótedi. Týyndylar shyǵarmashylyq dýet Gúljan Úzenbaeva men Dana Jubanova-Álıdiń oryndaýynda shyrqalady.

Gúljan Úzenbaeva – Qazaqstannyń eńbek sińirgen qaıratkeri, QR Kompozıtorlar odaǵynyń múshesi, Jambyl atyndaǵy Qazaq memlekettik fılarmonııasynyń solısi, Qurmanǵazy atyndaǵy Qazaq ulttyq konservatorııasy fortepıano kafedrasynyń professory. Dana Jubanova-Álı elimiz ben shetelde qazaq fortepıanolyq jáne kameralyq mýzykasyn belsendi nasıhattaýda. Qazaq ulttyq óner ýnıversıteti (QazUÓÝ) fortepıano kafedrasynyń dotsenti bola otyryp, 70-ten astam respýblıkalyq jáne halyqaralyq baıqaýlardyń laýreattaryn tárbıelegen. Kesh baǵdarlamasyna Gúljan Úzenbaevanyń eki fortepıanoǵa arnalǵan «Samǵaý» shyǵarmasy, sonymen qatar F.Shýbert, D.Shostakovıch, D.Gershvın, A.Borodın jáne t.b. jaýharlary engen. Kontsertke sondaı-aq QazUÓÝ stýdentteri Anna Grab pen Erlan Serkebaev (dotsent Dana Jubanova-Álıdiń synyby) qatysady.

12 qarasha saǵat 19.00-de Qazaqstan Kompozıtorlar odaǵynyń 80 jyldyǵyna oraılastyrylǵan «Kók baıraǵym, jelbire» kontserti ótedi. Osy shyǵarmashylyq odaqtyń bastaýynda 1939 jyly qazaq kompozıtorlyq mektebiniń kemeńgerleri – A.Jubanov, L.Hamıdı, E.Brýsılovskıı, M.Tólebaev, B.Erzakovıch, S.Muhamedjanov, B.Baıqadamov jáne t.b. boldy. Akademııalyq kásibı mýzykanyń qalyptasýy men damýy Qazaqstan Kompozıtorlar odaǵynyń qyzmetimen tyǵyz baılanysty.

«Kók baıraǵym, jelbire» kontsertinde Álibı Ábdinurov, Serikjan Ábdinurov, Halyqbergen Ábiljanov, Dýlat Ábildınov, Alıa Beskembırova, Keńes Dúısekeev, Serik Erkimbekov, Arman Jaıym, Tasqyn Jarmuhamet, Ásemgúl Jumadildına, Lázzat Jumanova, Slanqoja Qaraqystyq, Aqtoty Raıymqulova, Halyq Rızabek, Qarasaı Saıjanov, Qurmet Saqaı, Marat Sútishev, Aısulý Tanı, Sáýle Tuıaqova syndy qazaqstandyq sazgerlerdiń shyǵarmalary shyrqalady. Qazaqstan Kompozıtorlar odaǵynyń tóraǵasy – Balnur Qydyrbek. Júrgizýshi – Qýat Baǵysbek.

16 jáne 17 qarasha kúnderi saǵat 18:00-de tanymal «Ekran áýenderi» jobasy aıasynda súıikti kıno taspalardyń úzindilerinen turatyn tamasha áýender shyrqalady. «Igrýshka», «Djentlmeny ýdachı», «Balalyq shaǵymnyń aspany», «Trı oreshka dlıa Zolýshkı», «Korolek – ptıchka pevchaıa» jáne taǵy basqa fılmderden áýender joba avtory ári dırıjer Álıhan Ydyrysovtyń óńdeýinde oryndalmaq. Tyńdarman qaýymdy mýzykalyq shyǵarmalardyń premeralary, komedııalyq nómirler men erekshe stsenarııler shattyqqa bóleıdi.

20 qarasha saǵat 19:00-de aqyn ári kınorejısser Baqyt Qaıyrbekovtiń «Tabysqan suhbattastar» shyǵarmashylyq keshi ótpek. Baqyt Ǵafýuly Qaıyrbekov – Qazaqstannyń eńbek sińirgen qaıratkeri, Mahambet syılyǵynyń laýreaty, KSRO Jazýshylar odaǵynyń múshesi, Qazaqstan Respýblıkasy kınematografıster odaǵynyń múshesi, Reseı, Qytaı, Germanııa, Rýmynııa, Túrkııa, Vengrııa, Iran halyqaralyq kınofestıvalderi qatysýshysy. Shyǵarmashylyq keshte: «Meniń Abaıym» - uly aqynnyń shyǵarmashylyǵyna arnalǵan óleńder, aýdarmalar, fılmderden úzindiler, «Almatylyqtyń ómirbaıany» – «Dostar serti» mıýzıklinen úzindiler, avtordyń sózine jazylǵan ánder, sonymen qatar slaıd-shoý, klıpter usynylady. Sondaı-aq shyǵarmashylyq keshke kompozıtor, Qazaqstannyń eńbek sińirgen qaıratkeri Artýr Orenbýrgskıı, «Astana Opera» kameralyq hory, «Astana Mıýzıkl» jáne «Astana Balet» teatrlarynyń ártisteri qatysady.

24 qarasha kúni 12.00-de «Teatrǵa saıahat» toptamasynan balalarǵa arnalǵan «Úrlemeli jáne soqpaly aspaptar otbasy» kontserti usynylady. Kontsertte mýzyka, júrgizýshiniń sózi men jumbaqtar biriktirilgen. Oıyn úlgisinde balalar mýzykalyq aspaptardyń qurylǵysymen, olardyń dybystarymen tanysady. Kishkentaı kórermender naǵyz kásibı úrlemeli orkestrdiń oryndaýshylyǵynan lázzat alý múmkindigine ıe bolady. «Astana Opera» úrlemeli aspaptar orkestri dırıjer Rýslan Baımýrzınniń jetekshiligimen óner kórsetedi, mýzykatanýshy – Mádenıet qaıratkeri Marjan Jákenova.

24 qarasha saǵat 18.00-de «Qazaqkvartet shaqyrady» toptamasynan «Bethovenge tartý» kontserti ótedi. Mýzykalyq kesh uly kompozıtordyń 250 jyldyǵyna arnalǵan kontsertter toptamasyn ashady. Ǵ.A.Jubanova atyndaǵy memlekettik ishekti aspaptar kvarteti quramynda Aıdar Toqtalıev (1-shi skrıpka), Alekseı Lebedev (2-shi skrıpka), Bekzat Saılaýbaıuly (alt), kórkemdik jetekshisi – Qazaqstannyń eńbek sińirgen qaıratkeri Ernar Myńtaev (vıolonchel) tyńdarmandardy jańa baǵdarlamasymen qýantady. №2 ishekti aspaptar kvarteti, col major, or.18, №9 ishekti aspaptar kvarteti («Batyrlyq»), do major, or.59, №16 ishekti aspaptar kvarteti, fa major, or.135 shyrqalady. Kontsertter toptamasynda ártister nemis klassıginiń barlyq 16 kvartetin oryndaıdy.

28 qarasha kúni saǵat 19.00-de klassıkalyq ónersúıer qaýym nazaryna Vıacheslav Ýzbekovty eske alýǵa arnalǵan Music d’Accordo Astana kameralyq ansambliniń óneri usynylady. Qazaqstandaǵy kameralyq mýzyka janry tamasha pıanıst, keremet ustaz, professor Vıacheslav Týrkestanovıch Ýzbekovtyń esimimen tikeleı baılanysty. Onyń jeke baǵdarlamalarmen jáne ártúrli ansambldermen óner kórsetýi álemniń kóptegen sahnalarynda, sonyń ishinde «Astana Opera» Kameralyq zalynda úlken jetistikpen ótken. Ansambl quramyna V.T.Ýzbekovtyń shákirtteri engen: kontsertke qatysý úshin AQSh-tan arnaıy kelgen skrıpkashy Evgenıı De, sondaı-aq Nıgmetýlla Karımov (alt), Batyrhan Hasenov (kontrabas), Aleksandr Taraskın (fleıta), Damılıa Mahpırova (goboı), Áset Neldibaev (fagot), Gúljanat Janataeva, Saltanat Aqbasova, Ilıas Ýzbekov (fortepıano). Kesh baǵdarlamasynda F.Shýbert, R.Shýman, J.Franse, G.Fore, E.Elgar, S.Frank, A.Mıshektyń týyndylary oryndalady.

30 qarasha saǵat 19.00-de Nur-Sultan qalasy ákimdiginiń Memlekettik akademııalyq fılarmonııasy Kameralyq horynyń qatysýymen «Mne dovelos ıspıt ız rodnıka…» kontserti ótedi. Shyǵarmashylyq ujym osy jyly qazaqstandyq mýzykalyq qoǵam 90 jyldyǵyn atap ótip jatqan KSRO Halyq ártisi, B.Baıqadamov atyndaǵy Memlekettik hor kapellasynyń dırıjeri Anatolıı Molodovtyń repertýaryndaǵy hor týyndylarynan baǵdarlama usynbaq. Hormeıster – Erjan Sansyzbaev, ujymnyń kórkemdik jetekshisi ári dırıjeri – Mádenıet qaıratkeri Gúlmıra Quttybadamova.