Qarasha aıynda 2300-den astam altyn quıma satyldy

ALMATY. QazAqparat - 2020 jyldyń qarashasynda qazaqstandyqtar ekinshi deńgeıli bankterden jáne banktik emes aıyrbastaý pýnkterinen jalpy salmaǵy 74,1 keli, 2 327 quıma satyp aldy, dep habarlaıdy QazAqparat tilshisi.

Al jyl basynan beri jalpy salmaǵy 1,45 tonna bolatyn 40 081 altyn quıma satyldy.

Altyn quımalardyń bes túri bar: 5, 10, 20, 50 jáne 100 gram salmaqta bolady. Eń kóp satylǵany - 10 gramdyq quıma. Satylǵan barlyq quımanyń ishindegi onyń úlesi 25%, ıaǵnı, 10 199 dana bolyp otyr. Odan keıin 20 gramdyq – 9 061 dana (23%) jáne 100 gramdyq quıma – 8 863 dana (22%), 5 gramdyq – 7 001 dana (18%), 50 gramdyq quıma – 4 957 dana (12%).

Quımalardy satyp alý jaǵynan Almaty qalasy kósh bastap tur (54%). Odan keıin Atyraý (13%), Nur-Sultan (11%) jáne basqa óńirler (22%) alǵan.

Keri satyp alýǵa jalpy massasy 3,3 kg 129 ólsheýish quıma ǵana qaıtaryldy. Altyn quımalar – ınvestıtsııalaýdyń senimdi quraly bola alady. Bankterdiń jáne banktik emes aıyrbastaý pýnkteriniń klıentke «sol kúni» aqsha tóleı otyryp, quımalardy keri satyp alý múmkindigi – altyn quımalar naryǵynyń ótimdiligin qamtamasyz etýdiń negizgi faktory.

Qazir altyn quımalardy Halyk Bank-ten, Eýrazııalyq Bankten, Jýsan Bank-ten, Bank TsentrKredıtten, sondaı-aq banktik emes aıyrbastaý pýnktterinen satyp alýǵa jáne olarǵa keri satýǵa bolady.

Árbir quıma qorǵanysh elementterimen jabdyqtalǵan (quımalardyń bet jaǵy aınadaı, mıkromátin jáne bederli gýrt), sonymen birge quımalardy mehanıkalyq zaqymdanýdan qorǵaıtyn jáne qaptamasynyń ashylǵan-ashylmaǵanyn tez anyqtaýǵa múmkindik beretin arnaıy qaptamada shyǵarylady. Qorǵanysh qaptamasy da quıma sapasynyń sertıfıkaty sanalady. Sondyqtan quımany uqypty saqtap, qaptamasyn ashpaǵan durys.

Qazaqstan Respýblıkasynyń Ulttyq Banki halyq úshin tazartylǵan altynnyń ólshemdik quımalaryn satý jáne keri satyp alý Baǵdarlamasyn 2017 jyly iske qosty.