Qarasha aıynan bastap almatylyqtar arnaıy ortalyqtarda baılanystyń 4G nemese LTE qyzmetin paıdalana alady
ALMATY. Qazannyń 26-sy. QazAqparat /Erbol Azanbek/ - Almatylyqtar aldaǵy qarasha aıynan bastap arnaıy ortalyqtarda baılanystyń 4G nemese LTE qyzmetin synaq túrinde paıdalana alady. Bul týraly búgin Almatyda 700 Megagerts jıiliginde jumys isteıtin 4G ilki jobasynyń tanystyrylýy barysynda «Kar-Tel» JShS-niń Bas dırektory Anatolıı Popov aıtty.
Onyń aıtýynsha, kelesi aıda Almatynyń iri bıznes ortalyqtarynda arnaıy 10 kórsetý beldeýi ashylady. Bul ortalyqta turǵyndar 4G qyzmetimen keńinen tanysyp, paıdalana alady.
«Sondaı-aq qazirgi kezde qala ishinde jyljymaly synaq zerthanasy retinde arnaıy avtobýs jolǵa shyqty. Bunda da turǵyndar LTE qyzmetimen tanysyp, synaýǵa múmkindik alady. Bul qyzmettiń ereksheligi, eń aldymen jyldamdyq. Bundaǵy jyldamdyq 3G baılanysynan eki esege artyq. Sondaı-aq qyzmet túrleri basym. Bul baılanysqa qazirgi kezde álem elderi qyzyǵýshylyq bildirýde. Sondyqtan biz bul salany Qazaqstanǵa engizýdi qyzý qýattaımyz jáne aldaǵy ýaqytta Qazaqstanda baılanystyń bul túrin damytýǵa 50-80 mıllıon dollar kóleminde ınvestıtsııa quıýdy kózdeımiz»,- dedi A.Popov. Onyń aıtýynsha demoortalyqtar turaqty túrde jumys isteıtin bolady.
QazAqparat anyqtamasy: 4G tutynýshyǵa 326,4 Mbıt/sekýndqa jáne keri baǵytqa 172,8 Mbıt/sekýndqa deıin málimet jiberýdi júzege asyratyn baılanys túri. Bunda GSM, GPRS, EDGE, 3G qyzmetteri shoǵyrlandyrylǵan. Vıedoqońyraý men uıaly televıdenıe kórý, jyldamdyǵy joǵary ınternetti paıdalaný qyzmeti engizilgen. GSMA-nyń bıylǵy naýryz aıynda júrgizgen saýalnamasynyń málimetteri boıynsha álemdegi 26 baılanys operatory 2-3 jylda bul qyzmetti engizýdi kózdeıdi.
