Qarasaı aýdanynda 1200 oryndyq bilim oshaǵy boı kóterdi
TALDYQORǴAN. QazAqparat - Almaty oblysynda 32 bilim berý nysanynyń qurylysy júrgizilýde. Onyń ishinde 23 mektep, 1 sport zalyn japsarlas salý, 3 balabaqshany qaıta jańartý, 4 kolledjge arnalǵan jataqhana jáne 1 óner mektebi bar, dep habarlaıdy QazAqparat tilshisi.
Qarasaı aýdany Áıteı aýylyndaǵy B.Qosynov atyndaǵy orta mektep apatty jaǵdaıda bolýyna baılanysty 2018 jyly aýdan ákimi Jandarbek Dalabaevtyń qoldaýymen 3,5 gektar jer telimi bólinip, memlekettik-jekeshelik áriptestik aıasynda 1200 oryndyqqa arnalǵan bilim ordasy boı kóterdi. Atalmysh mekteptiń qurylysy tolyq aıaqtalyp, áıteılik oqýshylar aldaǵy oqý jylynda jańa mektepte bilimderin jalǵastyratyn bolady.
15 mekteptiń qurylysy 2021 jylǵa josparlanǵan.
«Oblysta 17 mekteptiń qurylysy júrip jatyr. Osy arqyly úsh aýysymdy mektepterdiń qatary azaıady dep otyrmyz. Aıta ketý kerek, jalpy sıpattaǵy transfertter esebinen 11 mektep, «Jumyspen qamtýdyń jol kartasy-2020« baǵdarlamasy boıynsha 6 mekteptiń qurylysy júrgizilýde»,- dedi Almaty oblystyq bilim basqarmasynyń basshysy Maıgúl Omarova.
Budan basqa, Jumyspen qamtýdyń jol kartasy boıynsha 1500 oryndyq taǵy 6 mektep jáne 29,9 mlrd teńge somasyna 1200 oryndyq 1 mektep salý kózdelgen.
Bilim berý isindegi jaǵymdy jańalyqtardyń legi munymen tolastamaq emes. Kegen aýdany, Saty aýylynda 1 qyrkúıekke deıin 2520 oryndyq 5 mektep paıdalanýǵa beriledi. Osy tektes jumystar oblystyń ózgede aımaǵy, Jambyl, Eskeldi, Kerbulaq aýdandarynda jyl sońyna deıin 560 oryndyq 3 mektep ashylady.
2020 jyly 23,9 mlrd teńge somasyna 55 bilim berý oshaǵy kúrdeli jóndeýden ótýde.
Búgingi kúni 55 sharttyń 55-i jasaldy, barlyq nysandar boıynsha óndiris kestesine sáıkes jóndeý jumystary júrgizilýde.
Naqtylap óter bolsaq, jergilikti bıýdjet esebinen 8 nysanǵa kúrdeli jóndeý júrgizilýde. Onyń ishinde 6 mektep, 2 balabaqsha bar. Bul maqsatta 1,9 mlrd teńge qarjy qarastyrylǵan.
Al, «Aýyl el besigi» baǵdarlamasy aıasynda 10 nysanǵa 4,5 mlrd teńgege kúrdeli jóndeý jumystary júrgizilýde.
«Jumyspen qamtýdyń jol kartasy» baǵdarlamasy sheńberinde 37 nysanǵa kúrdeli jóndeý júrgizilýde, oǵan 28 mektep, 5 mektep, 2 kolledj, 2 balabaqsha aýmaqtaryn abattandyrý jatady.
Eske salar bolsaq, 42 mekteptiń barlyq jóndeý jumystary bıylǵy jyldyń 20 qyrkúıegine deıin aıaqtalady.
Sondaı-aq 1,2 mlrd teńge somasyna 347 mekteptiń dárethanalary aǵymdaǵy jóndeýden ótti. Óńirdegi bilim berý oshaqtary osylaısha bilim kúnine daıyndyǵyn arttyryp jatyr. Bul rette oqýshylardyń jaǵdaıy nazardan tys qalǵan joq.
Oblystaǵy shalǵaı eldi mekenderden oqýshylardy tasymaldaý uıymdastyrylǵan.
Osy maqsatta jergilikti bıýdjetten 71 avtobýs satyp alýǵa 940,6 mln teńge bólindi. Búgingi kúni 61 avtobýs satyp alyndy.
Qalǵan 10 avtobýs qyrkúıek aıynyń sońyna deıin satyp alynady.
