Qarapaıym jumysshydan buryn keńsede otyrǵandar jıi qysqartylady - «Bolashaqtyń» túlegi Mamyraev
ASTANA. QazAqparat - «Qazaqstannyń memlekettik-jekeshelik ortalyǵy» AQ tóraǵasynyń orynbasary, «Bolashaq» baǵdarlamasynyń túlegi Ǵalymbek Mamyraevtyń oıynsha, el ekonomıkasyn jańǵyrtý sharalary aıasynda jumysshy mamandyqtardan buryn keńsede otyrǵan qyzmetkerlerdi qysqartý qaýpi basym bolyp tur, dep xabarlaıdy QazAqparat tilshisi.
«Menińshe, Qazaqstanda jumysshy mamandyqtarǵa kez kelgen ýaqytta jumys tabylady. Mysaly, jaqynda men poıyzben júrip keldim. Jolda 23 stansa boldy. Sonda baıqaǵanym, temir jol stansalarynda jumys istep júrgenderdiń ishinde egde jastaǵy azamattar kóp. Endi, olar ómir baqı ol jumysty istep júrmeıdi ǵoı. Báribir jas mamandarmen almastyratyn kez keledi. Árıne, Qazaqstan temirjoly osy jumysty óz paıdasy úshin emes, mamandardyń bolashaǵy úshin istese, quba-qup. Sondyqtan jańa jáne eski jumys oryndaryn eskersek, jumysshy mamandyqtarǵa suranys áli de azaımaıdy», - dedi Mamyraev Prezıdenttiń bıylǵy Joldaýyn talqylaýǵa arnalǵan jıynda.
Onyń aıtýynsha, óndiristik protsessterdi tolyǵymen avtomattandyrý úshin áli de biraz ýaqyt qajet. Sondyqtan qoldyń eńbegine suranys azaımaıdy. «Al keńsede otyrǵandar úshin aýyr bolady. Máselen, jaqynda biz «sarapshy» degen bir pozıtsııany qysqartyp tastadyq. Nege? Sebebi qazirgi kezde onyń jumysyn arnaıy baǵdarlama jasap jatyr. Aıyna ol baǵdarlamaǵa 10-aq dollar ketip otyr. Sondyqtan jumysshylardan buryn biz sııaqty «aq jaǵaly» qyzmetkerler qysqartýǵa jıi ushyraıtyn bolady. Keńsedegi jumys birte-birte azaıady», - dep atap kórsetti «Bolashaqtyń» túlegi.
