«Qarapaıym zattar ekonomıkasyn» damytý boıynsha 15 mlrd teńgeniń ótinimi maquldandy
NUR-SULTAN. QazAqparat - QR Ulttyq ekonomıka vıtse-mınıstri Ermek Alpysov qarapaıym zattar ekonomıkasyn» damytý baǵytynda qoldaý bildirgen ákimdikterdi atady, dep habarlaıdy QazAqparat tilshisi.
«2019 jyldan bastap Elbasynyń tapsyrmasyna oraı «qarapaıym zattar ekonomıkasyn» damytý boıynsha qoljetimdi nesıe berýdi sheshý úshin 600 mlrd teńge bólinýde. Ekonomıkalyq qyzmettiń 65 túri boıynsha 365 taýarlyq pozıtsııa belgilengenin bilesizder. Bul nesıeler «Bıznestiń jol kartasy - 2020» arqyly sýbsıdııalanady», - dedi Ermek Alpysov Úkimettiń baspasóz ortalyǵynda ótken brıfıng barysynda.
Óz sózinde vıtse-mınıstr 1 mamyrdaǵy jaǵdaı boıynsha bankter 14,9 mlrd teńgeniń 28 ótinimin maquldaǵanyn atap ótti.
«139,2 mlrd teńgeniń 104 jobasy ekinshi deńgeıli bankterdiń qaraýynda jatsa, 613,4 mlrd teńgeniń 729 jobasy qujattardy daıyndaý deńgeıinde. «Damý» qory 8 mlrd teńgeniń 24 jobasyn sýbsııadııalaýdy maquldady. Sonymen qatar, «qarapaıym zattar ekonomıkasy» boıynsha bıznesti qarjylandyrýdyń qoljetimdiligin arttyrý úshin aınalym qarajatyn nesıeleý úlesin ulǵaıtý sharalary qabyldandy. «Qarapaıym zattar ekonomıkasyn» «BJK-2020» arqyly kepildendirý quraly engizildi. Sondaı-aq «BJK-2020» boıynsha qarjylandyrýdy ulǵaıtý usynylyp otyr», - deıdi ol.
Ermek Alpysovtyń sózine qaraǵanda, jyl saıyn «Bıznestiń jol kartasy-2020» baǵdarlamasy boıynsha sýbsıdııalaýǵa jáne kepildendirýge qatysty ótinimder sany artyp keledi.
«Elbasynyń tapsyrmasymen baǵdarlamaǵa jyl saıyn qosymsha 30 mlrd teńge qarajat bólinetin bolady. Alaıda ákimdikter óńirlerdiń ekonomıkasyn damytýǵa múddeli bolýy tıis. Sondyqtan jergilikti atqarýshy organdar memlekettik qoldaý sharalaryn birlesip qarjylandyrýy qajet. Mysaly, Almaty qalasynyń ákimdigi sýbsıdııalaýǵa 1,9 mlrd teńge bóldi. Al Shymkent qalasynyń ákimdigi kepildendirýge 250 mln teńge, al Atyraý oblysy ákimdigi sýbsıdııalaýǵa 600 mln teńge bóldi. Qalǵandary osy ákimdikterden úlgi alýy tıis. Bul qosymsha rezervter», - deıdi vıtse-mınıstr.
Eske sala ketsek, ótken aıda «Bıznestiń jol kartasy-2020» memlekettik baǵdarlamasynyń iske asyrylý barysy qaralǵan Úkimet otyrysynda QR Premer-Mınıstri Asqar Mamın shaǵyn jáne orta bıznes «qarapaıym zattar ekonomıkasy» baǵdarlamasyna belsendi qatysýy qajettigin atap ótken bolatyn.
