Qarapaıym zattar ekonomıkasy: Túrkistan oblysynda 104 joba maquldandy

TÚRKІSTAN. QazAqparat – Túrkistan oblysy ákiminiń orynbasary Meıirjan Myrzalıevtiń tóraǵalyǵymen Óńirlik jobalyq keńseniń kezekti otyrysy ótti. Basqosýda «Qarapaıym zattar ekonomıkasy» salalardy damytý, ımport almastyrý jáne eksport boıynsha ótken jyly atqarylǵan jumystar qorytyndylandy, dep habarlaıdy QazAqparat tilshisi.

Jıyn barysynda Meıirjan Myrzalıev Elbasynyń bastamasymen qabyldanǵan «qarapaıym zattar ekonomıkasy» salalaryn damytý baǵdarlamasy aıasynda qarjylandyrý jumystary belsendi túrde júrgizilgenin atap ótti.

«Jalpy somasy 60,8 mlrd teńgeni quraıtyn 316 basym jobalar pýly qalyptastyrylyp, onyń ishinde 14,5 mlrd teńgeni quraıtyn 83 joba ekinshi deńgeıli bank jáne «Agrarlyq nesıe korporatsııasy» jumysynda tur, al 15,2 mlrd teńgeni quraıtyn 104 joba osy qarjy ınstıtýttarymen maquldanǵan. Jalpy baǵdarlama aıasynda aýyl sharýashylyǵy, tamaq ónerkásibi, týrızm, qyzmet kórsetý, jeńil ónerkásip jáne basqa baǵyttar boıynsha jobalar qarjylandyryldy», – dedi oblys ákiminiń orynbasary.

Onyń aıtýynsha, baǵdarlamaǵa jeke kásipkerlik sýbektilerin jappaı qatystyrý arqyly jobalar júzege asyrylýda. Bul boıynsha Túrkistan oblysy jyl sońyna deıin óńirler arasynda kóshbasshy oryndy qoldan shyǵarmaı keldi. Osyndaı nátıjeli jumysqa belsendilik tanytqan birqatar azamat oblys ákimi orynbasarynyń Alǵys hatymen marapattalǵan. Olardyń qatarynda «Agrarlyq nesıe korporatsııa» AQ fılıalynyń dırektory Q.Tursynqulov, «ATF Bank» AQ fılıalynyń dırektory B.Kálimbetov, «Qazaqstan Halyq Banki» AQ fılıalynyń dırektory A.Tasqarın jáne «Bank TsentrKredıt» AQ fılıalynyń dırektory A.Ońalbekov bar.

Jıyn sońynda Meıirjan Myrzalıev óńirdiń kóshbasshylyǵyn aldaǵy ýaqytta da saqtap, jeke kásipkerlik sýbektileri úshin baǵdarlamanyń qoljetimdiligin arttyrý qajettigin qarjy ınstıtýttarynyń ókilderine eskerte ketti. Sonymen qatar, ekinshi deńgeıli bank, «Agrarlyq nesıe korporatsııa», «Damý» kásipkerlikti damytý qory» fılıaldary basshylarymen birqatar kásipkerdiń jobalaryn talqylap, jobalardy qaraý jáne maquldaý protsesin jedeldetýdi tapsyrdy.