«Qarapaıym zattar ekonomıkasy»: Qostanaıda 424 jumys orny ashyldy

QOSTANAI.QazAqparat – Qostanaılyq kásipkerlerdi qoldaý úshin qosymsha qarjy bólindi. Bul týraly oblys ákimdiginde ótken jıynda kásipkerlik jáne ındýstrıaldy-ınnovatsııalyq damý basqarmasynyń basshysy Oljas Saparbekov aıtyp berdi, dep habarlaıdy QazAqparat tilshisi.

Jergilikti kásipkerlerdi qoldaý úshin óńirde «Qarapaıym zattar ekonomıkasy» baǵdarlamasynyń múmkindikteri tolyq paıdalanylýda. Máselen, jyl basynan beri baǵdarlama boıynsha 43,2 mlrd teńge bolatyn 248 joba iske asyryldy.

«Taǵy 15 aýqymdy joba ekinshi deńgeıli bankter men Aýyl sharýashylyǵyn qoldaý qorynda qaralyp jatyr. «Qarapaıym zattar ekonomıkasy» baǵdarlamasyn iske asyrý boıynsha bizdiń oblys respýblıkada 4-shi orynǵa turaqtady. Búginge deıin 424 turaqty jumys orny ashyldy. Jylyna 20 myń tonna et óndiretin «BEEF EXPORT GROUP» zaýytyn salý arqyly 200-deı adamǵa jumys tabyldy», - deıdi basqarma basshysy.

Kásipkerlik jáne ındýstrıaldy-ınnovatsııalyq damý basqarmasynyń aqparatyna súıensek, oblysta «Bıznestiń jol kartasy-2025» aıasynda kásipkerlerdi qoldaý úshin 2,7 mlrd teńgeden astam qarajat bólindi. Keıin daǵdarysqa qarsy sharalar aıasynda respýblıkalyq bıýdjetten qosymsha taǵy 2 mlrd teńge aýdarylǵan. Bul qarjat karantın ýaqytynda qıyndyqqa tap bolǵan kásipkerlerge aıtarlyqtaı kómek boldy. Ótken jylmen salystyrsaq, osy jyly nesıelerdi sýbsıdııalaý úshin qarjy 2 ese kóp bólingen. Nátıjesinde kepildendirý somasy 6 ese ulǵaıǵan.