«Qarapaıym zattar ekonomıkasy» baǵdarlamasyn qarjylandyrý 1 trln teńgege deıin ulǵaıtyldy

NUR-SULTAN. QazAqparat - «Damý» kásipkerlikti qoldaý qory ekinshi deńgeıli bankterden qarjylandyrylý úshin qujattar toptamasyn ázirleý barysynda bızneske qoldaý kórsetedi. Bul týraly Ortalyq kommýnıkatsııalar qyzmetindegi brıfıngte QR Ulttyq ekonomıka vıtse-mınıstri Jasulan Mədıev aıtty, dep habarlaıdy QazAqparat tilshisi.

«Qarapaıym zattar ekonomıkasy« baǵdarlamasy boıynsha jobalardy qarjylandyrý úshin kredıtteýdiń jalpy kólemi 400 mlrd teńgeden 1 trln teńgege deıin ulǵaıtyldy. Bul somadan 700 mlrd teńge agroónerkásip keshenindegi qaıta óńdeý men óndiriske, 300 mlrd teńge óńdeý ónerkásibi men qyzmetterge jumsalatyn bolady. Buǵan qosa, Memleket basshysynyń tapsyrmasymen 100 mlrd teńge mólsherindegi qarajat kóktemgi egistik jumystaryn qarjylandyrýǵa beriledi. AÓK-tegi qańta óńdeý men óndiristi kredıtteýdiń jańa operatory retinde ekinshi deńgeıli banktermen qatar Agrarlyq kredıttik korporatsııa qyzmet kórsetedi», - dedi ol.

Onyń aıtýynsha, «Qarapaıym zattar ekonomıkasy» baǵdarlamasy aıasynda 5 mlrd teńgege deıingi kredıtterdiń kepildik kólemi 30 paıyzdy quraıdy. Eger qarjylandyrý qajettiligi 3 mlrd teńgeden aspasa onda kepildendirý zaım somasynyń 50 paıyzyna deıin bolady.

Bul rette ekinshi deńgeli bankterden qarjylandyrylý úshin qujattar toptamasyn ázirleý barysynda bızneske «Damý» kásipkerlikti qoldaý qory qoldaý kórsetedi. Damý fılıaldary elimizdiń barlyq óńirlerinde, iri qalarynda jumys isteıdi.

«Damý tarapynan kredıtterdi sýbsıdııalaý elektrondy úkimet (E-gov) pen Online Damu platformalar arqyly onlaın rejımde kórsetiledi. Árbir óńirdegi menedjerlerdiń telefon nómirleri qordyń resmı saıtynda jáne áleýmettik jelilerdegi paraqshalarynda qoljetimdi»,- dedi Jasulan Mádıev.