Qarapaıym zattar ekonomıkasy: Atyraý oblysynda 650 mln teńge ıgerildi

ATYRAÝ. QazAqparat – Bıyl Atyraý oblysynda «Qarapaıym zattar ekonomıkasy» baǵdarlamasyna bólingen 650 mln teńge ıgerildi, dep habarlaıdy QazAqparat.

Bul týraly Prezıdent Qasym-Jomart Toqaevtyń Qazaqstan halqyna arnaǵan «Halyq birligi jáne júıeli reformalar – el órkendeýiniń negizi» atty Joldaýy talqylanǵan jıynda oblys ákimi Mahambet Dosmuhambetov málim etti.

«Atyraý oblysynda 2022 jyly gaz-hımııa kesheni qurylysynyń birinshi kezeńi iske qosylyp, 500 jumys orny qurylady. Polıpropılen óniminiń 90 paıyzy eksporttalady.

Al, 2024 jyly polıetılentereftalat jáne tereftal qyshqyly óndirisiniń qurylysy iske qosylyp, ​230 jumys orny ashylady», - deıdi Mahambet Dosmuhambetov.

Ákimniń málimetine súıensek, bıyl Atyraý oblysyna «Qarapaıym zattar ekonomıkasy» baǵdarlamasymen 650 mln teńge bólingen. Qazir bul qarjy tolyq ıgerilgen. Sondaı-aq, 27,1 mlrd teńgeni quraıtyn 67 joba iske asyrylyp jatyr.

«Ekinshi deńgeıli bankter men Agrarlyq nesıe korporatsııasy 11,2 mlrd teńgeniń 49 jobasyn maquldady. Sonyń nátıjesinde 1175 joba qarjylandyrylyp, 3513 jumys orny saqtaldy. Buǵan qosymsha 1 237 jańa jumys ornyn qurý josparlanýda. Bıyl «Jumyspen qamtýdyń jol kartasy» memlekettik baǵdarlamasymen 1 mlrd teńge bólindi.

Bul qarjyny 238 bıznes-jobany qarjylandyrýǵa jaratý kózdelip otyr», - dep málim etti óńir basshysy.

Eske sala ketelik, buǵan deıin Atyraýda 33 mlrd teńgeniń jobalary iske asyrylyp

jatqanyn habarlaǵan edik.