Qarapaıym zattar ekonomıkasy: Aqmola oblysynda 250-den astam joba júzege asyrylýda

KÓKShETAÝ. QazAqparat - Aqmola oblysynda «qarapaıym zattar ekonomıkasy» baǵdarlamasy aıasynda ımporttyq áleýmettik mańyzy bar azyq-túlik taýarlaryn jergilikti taýarlarǵa aýystyrý boıynsha josparly jumystar júrgizilýde, dep habarlaıdy QazAqparat tilshisi oblystyq ishki saıasat basqarmasyna silteme jasap.

Kásipkerlik jáne ónerkásip basqarmasynyń málimetinshe, oblysta densaýlyq saqtaý, aýyl sharýashylyǵy, mal sharýashylyǵy jáne basqa da birqatar qyzmet salalary qamtylatyn bolady, onda shaǵyn jáne orta bıznestiń 256 jobasy qarjylandyrylmaqshy.

«Memleket basshysy Qasym-Jomart Toqaev «qarapaıym zattar ekonomıkasyn» damytý mindetin qoıdy. Osy tapsyrmany júzege asyrý sheńberinde oblystyń barlyq óńirlerinde kásipkerlik nysandaryn sýbsıdııalaý túrinde qoldaý kórsetý boıynsha naqtyly sharalar júrgizilýde», - dep atap ótti vedomstvodan.

Jeńildikpen nesıelendirýdiń arqasynda ótken jyldyń kúzinde Shortandy aýdanyna Germanııadan 128 bas sımmental sıyry satyp alynyp, «MilkProduct» JShS jańa sút-taýar fermasy ashyldy. Kásiporynnyń qýattylyǵy jylyna 4,5 myń tonna sút ónimin quraıdy. Shamamen 15 adam jumysqa ornalastyryldy. Seriktestik dırektory Danııar Esetovtyń aıtýynsha, joba eki kezeńde júzege asyrylyp, aǵymdaǵy jyldyń sońyna qaraı aıaqtalady.

«Biz «Agrokredıt korporatsııasy» baǵdarlamasyn paıdalana otyryp, memlekettiń úlken qoldaýyna ıe boldyq. Búgingi tańda kásiporyn aıyna 20 tonna sút satyp alady. Ónimdi elimizdiń iri qalalary - Nur-Sultan, Temirtaý, Kókshetaý, Petropavl jáne Pavlodar qalalaryna jetkizemiz. Biz aldaǵy ýaqytta óndiristi damytý jáne kólemin ulǵaıtý josparlap otyrmyz. «Qarapaıym zattar ekonomıkasy» arqasynda kásipkerlerge naqtyly qoldaý kórsetilip keledi», - dep atap ótti kásipker Danııar Esetov.