«Qarapaıym zattar ekonomıkasy»: 41 mlrd teńgeniń 92 jobasy maquldandy
NUR-SULTAN. QazAqparat - «Qarapaıym zattar ekonomıkasy» boıynsha 92 joba maquldandy. Bul týraly Úkimet otyrysynda QR Premer-mınıstriniń orynbasary Jeńis Qasymbek málim etti, dep habarlaıdy QazAqparat tilshisi.
«4 shildedegi jaǵdaı boıynsha jobalyq keńse jumysynda «Qarapaıym zattar ekonomıkasy» boıynsha 1 trln teńgeden astam somada 1,5 myń bıznes-joba bar. Bul eldegi barlyq áleýetti qatysýshylardyń shamamen otyz paıyzyn quraıdy. Onyń ishinde 41 mlrd teńgeni qamtyǵan 92 joba maquldandy, al 280 mlrd teńgeden astam 166 joba bankte qaralý ústinde», - dedi J. Qasymbek.
Onyń sózine qaraǵanda, «Qarapaıym zattar ekonomıkasy» jobalary boıynsha bıznestiń joǵary belsendiligi Aqmola, Mańǵystaý, Pavlodar oblystarynda jáne Almaty qalasynda baıqaldy.
Osy oraıda Atyraý, Qostanaı, Batys Qazaqstan oblystary men Nur-Sultan qalasynyń ákimderine bul baǵyttaǵy jumystardy kúsheıtý qajettigi ataldy.
«Tek sońǵy aıda maquldanǵan jobalar sany eki esege artty. Negizgi nesıelengen jobalar azyq-túlik ónimderin (6,6 mlrd teńge), qyzmetterdi (11,1 mlrd teńge), agroónerkásiptik keshenin (4,2 mlrd teńge) jáne jeńil ónerkásipti (2,7 mlrd teńge) qamtydy. Maquldanǵan 92 jobanyń 29-y jańa óndiristerdi qurýdy, 63-i qoldanystaǵy óndiristi keńeıtýdi kózdeıdi. Atalǵan jobalardy iske asyrý shamamen 2 myń jumys ornyn qurady», - dedi Jeńis Qasymbek.
