Qarapaıym turǵyn eńbek mıgrantyn jumysqa jaldaı ala ma
NUR-SULTAN. QazAqparat -Kóshi-qon qyzmeti komıteti qazaqstandyq jeke tulǵalardyń eńbek mıgrantyn jumysqa tartý tártibi týraly aıtty, dep habarlaıdy QazAqparat tilshisi.
Komıtet tóraǵasynyń orynbasary Arman Sadanov el zańnamasynda sheteldiń eńbek mıgrattaryn jeke tulǵalar da shaqyra alatynyn aıtady.
«Jeke tulǵa bes sheteldik eńbek mıgrantyn zań aıasynda kirgize alady. Alaıda, olardyń eńbegin paıdalaný arqyly tabys tappaýy kerek. Mysaly, siz úı salǵyńyz keldi deıik. Ol úshin siz sheteldik eńbek mıgranttaryn jaldaı alasyz. Eńbek mıgrantyn tirkeý, oǵan JSN alý, medıtsınalyq tekserýlerden ótkizý sııaqty jalpyǵa ortaq erejeden bólek taǵy bir shart bar. Siz ony tek turmystyq jumysqa ǵana tarta alasyz. Al onyń eńbeginen tabys tabýǵa haqyńyz joq. Mysaly, oǵan palaý daıyndatyp, sata almaısyz», - deıdi komıtet ókili.
Arman Sadanov eńbek mıgranttaryn tirkeý máselesinde «086» formaly medıtsınalyq anyqtama alý tártipterin ońtaılandyrý kerektigin aıtady.
«Atalmysh anyqtamany alý úshin aǵza taldaýlarymen qosa lor, kóz dárigeri sııaqty mamandardyń aldynan ótýi kerek. Bizdiń oıymyzsha, bul sheteldiktiń ýaqytyn bosqa alatyn protsester. Eń bastysy, qaýipti jáne juqpaly aýrýlardyń bolmaýyn qadaǵalaý. Osy turǵyda densaýlyq saqtaý mınıstrligimen birge jumys istep jatyrmyz. Eńbek mıgranttary úshin «086» formaly medıtsınalyq anyqtamany alý sharttary jeńildeýi múmkin», - deıdi ol.
Aıta ketsek, búgin elordada kóshi-qon qyzmetin kórsetý ortalyqtarynyń jumysyn jetildirý máselesin talqylaǵan jıyn ótti.
