Qarapaıym halyqtyń salyq ósimpuly qaı jaǵdaıda keshiriledi
Bul týraly QR Qarjy mınıstrliginiń Memlekettik kirister komıteti tóraǵasynyń orynbasary Jaıdar Іńkárbaevtyń QR Prezıdenti janyndaǵy ortalyq kommýnıkatsııalar qyzmetinde ótken brıfıngte aıtty.
«Salyq beresheginiń eń kóp somasy nemese 70 paıyzy (14,4 mlrd. teńge) kólik quraldaryna salynatyn salyqqa tıesili. Jer salyǵyna jalpy bereshektiń 12 paıyzy (2,5 mlrd.teńge), múlik salyǵyna 6,7 paıyzy (1,4 mlrd. teńge) tıesili. Salyq boryshy bar jeke tulǵalardyń basym bóligi Shymkent qalasynda tirkelgen. Munda shamamen 148 myń adam qaryz. Túrkistan oblysynda 139 myń, Jambyl oblysynda 116 myń jáne Nur-Sultan qalasynda 114 myń adam salyqty tolyq tólemegen», - deıdi komıtet ókili.
Bereshek somasy boıynsha, Almaty qalasy birinshi orynda. Qala turǵyndary memlekettik kiris organdaryna 5,5 mlrd. teńge qaryz. Nur-Sultan jáne Mańǵystaý oblysynda 2 mlrd. teńgeden, Shymkent qalasynda 1,6 mlrd. teńge bereshek qalyptasqan.
Jaıdar Іńkárbaev salyq bereshegi boıynsha qordalanǵan ósimpuldy shegertý úshin negizgi qaryz somasyn ǵana óteý kerek ekenin atady.
«Ósimpuldy shegerý úshin negizgi salyq qaryzyn tólese boldy. Ol úshin eshqaıda baryp, eshqandaı ótinish jazýdyń qajeti joq. Negizgi bereshek tólengennen keıin 3 kún ishinde ósimpul avtomatty túrde shegeriledi. Bizdiń mamandar árbir salyq tóleýshiniń deregin kún saıyn tekserip otyr. Bereshek ósimpulynyń shegerilgenine kóz jetkizý úshin salyq tóleýshiniń jeke kabınetine ótip bilýge bolady. Al búginge deıin salyq bereshegimen qosa ósimpuldy da tólep qoıǵan adamdarǵa ósimpul somasy qaıtarylyp beriledi. Ol úshin salyq tóleýshi memlekettik kirister organyna baryp, ótinish jazýy kerek. Sonyń negizinde artyq tólengen soma ótinish berýshiniń atyndaǵy esepshotqa aýdarylady», - dedi ol.
Degenmen, ázirge eshbir boryshkerdiń ósimpuly shegerilmegen.
«Ázirge ósimpul shegerý erejesi naqtylanyp jatyr. Barlyq óńirlerge tıisti aqparattar berilip, tapsyrmalar júkteldi. Erejemen barlyq óńirler tanysyp bolǵannan keıin ósimpuldar shegerile bastaıdy», - dedi vedomstvo ókili.
Aıta keteıik, osyǵan uqsas raqymshylyq shaǵyn jáne orta bıznes nysandaryna berilip otyr. Búginge deıin sonyń aıasynda 40 myń qazaqstandyq salyq aıyppulynan qutylǵan.
