«Qaraózek» sý qoımasyn salýǵa qarajat qashan bólinedi

Qyzylorda oblysynda «Qaraózek» sý qoımasyn salýǵa 3,96 mlrd teńge qarajat qajet. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.

«Qaraózek» sý qoımasy mal sharýashylyǵynyń jemshóp bazasyn qurý jáne Qazaly aýdanynyń egistik alqaptaryn sýarý maqsatynda kól júıeleriniń tolyǵýy jáne shabyndyq-jaıylymdyq jerlerdi sýlandyrý úshin paıdalanylatyn bolady», - dedi Úkimet basshysy jaýabynda.

Onyń atap ótýinshe, sý qoımasynyń jalpy syıymdylyǵy – 775,0 mln shekte metr. Joba boıynsha Baıgeldi, Kartonkombınat jáne Qojataı ýchaskelerinde 3 tejeýish-bógeýish qurylysty salý kózdelgen. Olar boıynsha bıyl tehnıkalyq-ekonomıkalyq negizdemege túzetý júrgizildi. Tehnıkalyq-ekonomıkalyq negizdeme túzetilgennen keıin jobanyń jalpy quny 3,96 mlrd teńgeni qurap otyr.

«Osyǵan baılanysty qurylys-montajdaý jumystaryn júrgizýge respýblıkalyq bıýdjetten qarajat bólý máselesi memlekettik saraptamanyń oń sheshiminiń qorytyndysy boıynsha belgilengen tártippen qaralatyn bolady», - dedi Premer-Mınıstr.