Qaraótkelde qar sýynan qaýip bar ma
ASTANA. KAZINFORM – Elordadan 17 shaqyrym jerde ornalasqan Qaraótkel aýylynyń aýlalarynda sý jatyr. Dese de, aýyl ákimi úıge kiretindeı qaýip joq ekenin, sý der kezinde sorylyp, syrtqa shyǵarylyp jatqanyn alǵa tartyp otyr. Agenttik tilshisi atalǵan aýylǵa arnaıy baryp keldi.
Buǵan deıin aýyl turǵyndary qardyń durys tazalanbaǵanyn, saldarynan úılerdi sý basý qaýpi joǵary ekenine shaǵymdanǵan bolatyn.
Aýyl ákimi Talaptan Daýyltaevtyń aıtýynsha, turǵyndar «túımedeı nárseni túıedeı» etip, bosqa dúrligip otyr.
«Osy ýaqytqa deıin aýyldan 125 myń tekshe metr qar shyǵaryldy. Aýyl syrtynda qar shyǵaratyn arnaıy polıgon bar. Turǵyndar aýlaǵa kirgen az mólsherdegi sýǵa bola alańdap otyr. Daladan keletin qar sýynan qaýip joq. Oblystan 17 áskerı mamandar keldi. Astana qalasynan da tótenshe jaǵdaılar departamenti qyzmetkerleri tartyldy. Motopompalar jumys istep tur. Jaǵdaı tolyq baqylaýymyzda», - dedi aýyl ákimi.
Munda búginde 37 myń turǵyn qonys tepken. Turǵyndardyń biri Aıgúl Temirova kúni-túni bir tynbaı, qar sýymen arpalysyp jatqan azamattarǵa alǵysyn bildirdi.
«Eń bastysy jergilikti turǵyndarǵa alǵys aıtqym keledi. Bir-birine demeý berip, barynsha qoldaý kórsetip jatyr. Jergilikti ákimdikke de, arnaıy qyzmet ókilderine de rızashylyǵymdy bildiremin», - dedi ol.
Qolynda tehnıkasy bar aýyl turǵyndary ákimdikke qol ushyn sozyp, jergilikti turǵyndar qumdy qapqa salý sııaqty jumystarǵa belsendi atsalysyp jatqanyn atap ótken jón.
