Karantınnyń kúsheıtilgen rejımi: Polıtsııa qyzmetkerleriniń jumysyna túsinistikpen qaraý kerek

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaev karantınniń kúsheıtilgen rejıminde polıtsııa qyzmetkerleriniń jumysyna túsinistik tanytýdy surady, dep habarlaıdy QazAqparat tilshisi.

«Qoǵamdyq kólikke, taksı, tamaq jetkizý qyzmetterine sanıtarlyq talaptardy qatań saqtaý úshin tsırkýlıar jasalady. Keshe aıtylǵandaı, búgin túngi 12-den bastap úıden shyǵýǵa shekteý qoıylady. Úıden tek azyq-túlik, dári alýǵa nemese jumysqa barý úshin shyǵýǵa bolady», - dedi mınıstr «Habar 24» telearnasynyń tikeleı efırinde.

Sonymen birge, 30 naýryzdan bastap mekemelerdiń basym kópshiligi jumysyn toqtatady.

«Kóshede polıtsııa qyzmetkerleri toqtatyp, qaıda bara jatqanyńyzdy surasa, oǵan túsinistik tanytyp, jaýap berý kerek. Jumysqa shaqyrǵandy rastaý úshin sizde tikeleı basshynyń nemese kadr bólimi qyzmetkeriniń telefon nómiri bolǵan jón.

Azyq-túlik dúkenderi men dárihanalar, ádette, turǵyn úılerge jaqyn ornalasady. Sondyqtan, polıtsııa qyzmetkerleri turǵyndardyń qajetti zatyn satyp alyp, úıge qaıtqanyn baqylaýy múmkin. Oǵan da túsinistik tanytý qajet», - dedi Dáýren Abaev.

Aıta keteıik, koronavırýs ınfektsııasymen Nur-Sultan qalasy boıynsha 60 adam, Almaty qalasynda – 48 adam, Qaraǵandy qalasynda - 4, Jambyl oblysynda -3 adam, Atyraý oblysy - 3 adam, Shymkent qalasynda - 2 adam, Almaty oblysynda - 1 adam, Aqtóbe oblysynda - 1 adam, Soltústik Qazaqstan oblysynda - 1 adam, Aqmola oblysynda - 1 adam, Pavlodar oblysynda - 1 adam, jalpy 125 naýqas tirkeldi.

Buǵan deıin Dáýren Abaev karantın rejımi kúsheıtilgen kezdegi kóshede júrý talaptaryn túsindirgen edi.

Sondaı-aq, koronavırýstan qaıtys bolǵandardy jerleý týraly bas sanıtarlyq dárigerdiń qaýlysy shyǵady.